Naga sculptor artist-i poetic visuals yanglur

Dimapur, February 11 (TYO): Kanoria Centre for Arts Scholarship aser Lalit Kala Research Scholarship takok angur, Nagaland nungi sculptor artist, H. Akup Buchem-i iba poetic visuals art nung alizüng ka tongtetogo.
Tawa Buchem indang art exhibition Delhi nung Indian art fair nung February 2 nungi 5 nü tashi kaogo.
Pa indang mapa dak sentakba nung Buchem-i, “Yimti tezülen soa intet asünung ni kü temeket tesem nung temelenshitem nguogo. Mapang aoba den külemi alima nung loktiliba aser pei aliba temeket melenshipet melenshir,” ta ashi.
Nagaland nungi lanur artist-isa, Naga tribal lokti nung züngsem ka ama lenla aika nung kongshia kü mapa nung terenlok kaogo, ta ashi.
Pa mapa dak sentakba nungsa Buchem-i, pai terracotta, süng, kongsang, süngsem, shidi aser non conventional osettem kanga sabua amshir, ta ashi.
2005 küm nungi tenzüka Buchem-i group shows 13 nung shilem agiogo, aser tang tesüsa Lalit Kala Annual Show, Regional Centre, Kolkata nung shilem agiogo.
Pa indang nija show ji 2010 küm Nagaland State Academy, Kohima küm kaa liasü.
Pa state nung workshops aser camps aika nung adenba aser shilem agiba dak alia Buchem-i New Delhi, Orissa aser Kolkata densema yimti kar nung shilem agiogo.