Naga tebilemtsü teti atema angatetteptsü : Rajnath Singh

New Delhi, November 5 (Agencies) : Tang tejembidak Naga yimjung olemtep kanga junga odar aser nisung ajak temulung sünemtsüsa iba onük angatetteptsü, ta Union Home Minister, Rajnath Singh-i ashi.
Naga Students Union, Delhi (NSUD) sentong nung jembidang, Rajnath-i ashiba agi, Naga nunger tesem nung yimjung bener arutsü atema centre sorkari mapa inyakba joko tatemlen tonga arur.
“Naga nungertemi aginüba ama Naga yimten tebilemtsü teti atema angatetteptsü asoshi inyakba mapa nung tesüiba küm ana terenlok aika nguogo” ta pai ashi.
August 3, 2015 nü Prime Minister Narendra Modi aser Home Minister na matsüngdang NSCN-IM general secretary T Muivah aser Centre atema interlocutor R N Ravi tsüngda ‘Framework Agreement’ ka sign asü.
1997 küm ceasefire tenangzüktep agiba sülen küm 18 tashi olemtep 80 den tema liyonga aruba sülen iba ‘Framework Agreement’ agitep.
“Kü medemertem, iba yimti ya nenok meyong aser nenok nem kibur ama bilemdaktsütsübaji sorkar indang mapa lir. Nenok den Northeast nungi tangar medemertem Delhi nung sadoka lidaktsütsü asoshi ni Delhi Police nung Special Cell ka nenok atema lapoktsüogo. Iba Cell ji Northeast nungi Joint Police Commissioner kati ketdangsüa repranger” ta Rajnath-isa tanü ashi.
“Home Ministry nung North-East nungi Minister ka lir aser paji Kiren Rijiju lir. Pai nenok indang khurettem angateta lir aser nenok den tajungba jembishinütettsü” ta paisa shisem.
“British nungeri yimsüsüba mapang tenzüka yutsüba inyakyim aikati tanü Northeast nung timtem agütsür. British nunger yimsüsürtemi shishilembaba aser yimten taginüba nung ajemdaker, tenem aser lenden nung alirtem tsüngda telemsa adokdaktsü. Tenem aser lenden nung alirtem tsüngda tesentaktep ayudak tenemtsüng tesemtem British nungeri süngo, totzü aser nakmati atema agi. Ibaji ajanga parnoki tenem aser lenden nung alirtem tsüngda tetsüngda adokdaktsü,” ta Rajnath-isa metetdaktsü.
British nunger yimsüsürtemi senotsü aser otsütem purateta tenem aser lenden nung alirtem tsüngda tangatetba nunga tepila adokdaktsü. Naga nunger tangutsü tim akhüm, jenjang aser tesem angutsü atema India sorkari tenangzükba yur mapa inyaker. Asen Naga nunger adianutem mepelai lira, India-i mepelar, ta paisa shisem.
Northeast nunger lendong nungi jenbua alitsü atema Delhi Police-i mapa inyaker, ta Home minister-isa ashi.
“Taoba küm ka tsüngda Delhi Police-i Northeast nungi asangur aser aiür 450 shimogo. Onoki ano talila shimoknür. Tang Delhi Police nung nübo shimokba mapa inyakba nung Northeast nungia asangur 6,000 aser aiür 28,000-i tenüng agüja lir” ta paisa shisem.
India nüjiso ngur küm aika süia aruaka Naga nunger nüjiso atema rarartem mebilemtet t Rajnath-isa ashi aser pai parnok nem tenüngsang agütsü.
“India nüjiso anguba sülen mapang talangka aruaka Jadonang aser Rani Gaidinliu ama
Naga nunger nüjiso atema rarartem mebilemtetba atema sasa bilemer” ta pai metetdaktsü.
India indaktsüba nung Naga nunger nüjiso atema rarartem, parliamentarian tejentem, ketdangser tajungtem aser shisashirtemi shilem tajung agia arudar” ta paisa shisem.