Naga tebilemtsü ya yimten tebilemtsü masü: Adinno

Kohima, Monupii (May) 16 (TYO): Naga aser India nunger tsüngda külem putiotsü kecha mali aser Naga tebilemtsü ya yimten tebilemtsü ka ta ashibaji tai lir, ta Naga National Council (NNC) President, Adinno Phizo-i tanü metetdaktsü.
Peace Camp, Chedema nung Naga National Council-i Naga Plebiscite Day 67 buba sentong ayonga amungdang Adinno-i ashiba agi, May 16, 1951 nü Naga nunger ajungai India nung madentsü ta Naga Voluntary Plebiscite nung shilem agi.
“Asenoki ya linük ka lir aser ibaji tangari agütsüba masü saka asen sasa kümtetba lir. Naga nungertem asen linük nung lir aser kodanga India den tesentaktep maliasü. Naga nungeri India nunger dang kecha memeshir, anungji olemteptsü kecha mali” ta laisa ashi.
“India aser Nagaland tsüngda langka ka angatetteptsü lir ta India-i alima dang sayunür saka India nunger nisung billion ka nung ochishir ka danga mali” ta Adinno-isa shisem.
Naga nunger pei linük nung alir saka India sorkari lar army Nagaland nungi magiener. Parnoki Armed Forces Special Powers Act 1958 magiener aser tanü tashi Nagaland meketbanga lir. Asenok linük tila ka lir saka linük tulu kati linük tila ka amokbanga ayuba nung akhümket kecha mali, ta NNC President-isa metetdaktsü.
August 3, 2015 nü ‘Framework Agreement’ ji tajung masü, kechiyong India sorkari Naga linük nung telemsa adokdaktsütsü atema NSCN-IM amshir. Parnoki Naga putiotsü tera dang meteta liaka ‘framework agreement’ yanglutsü atema NSCN-IM mesüzük. Ajisüaka, parnoki küm ana dak tema iba agreement miimbanga dang lir, ta Adinno-isa shisem.
Iba sentong nung FGN Kedahge Viyalie Metha, AZ Punyü aser Thepfulhouvi Solo nungertemia o jembi.
Sentong nung mendenji CEC NNC member Kolezo Chase liasü, Rev. Savito Nagi-i temoatsü meshia sarasadem, Old Minister Hill Women Prayer Fellowship, Kohima aser Chedema Baptist youth temi ken aten aser Sano Vamuzo-i tenüngsang agüja sarasadem.