Naga tsür 4 nem MykiFest Award 2021-2022 agütsü

Dimapur, March 8, 2022 (TYO): March 8, 2022 International Women’s Day in dang sen tong ka agidang tetsür pezü nem MykiFest Award 2021-2022 agütsüogo.

Parnok ya Sesino Yhoshü, Zakilhounuo Tepa, Abi Humtsoe aser Sibeule Zeliang nunger lir aser sempet angur shia Rs . 40,000 senpet den kulikaket den sempettem agütsü. Sesino Yhoshü ya TakeOne, Kohima kibur lir. TakeOne ya 2014 küm lapok aser iba ya audiovisual production house ka lir.

65th National Film Awards nung lai yangluba “The Pangti Story” ajanga Best Environmental Film (non-feature) takok angu. 7^th National Science Film Festival 2017 nunga kasa film ajanga Golden Beaver Award ngua liasü. Sesino Yhoshü-i Young Achievers Award agizükogo.

Laisa Northeast Film Festival 2015 nung “Story of a House” atema Best Director (Short Film) sempet ngua liasü. Zakilhounuo Tepa ya Taxi Driver ka lir aser la ya Kohima district kübok Mirna yimtsür lir.

La arishi küm 31 tain asüdang gari anitsü angazük aser 2014 nungi la indang taxi anishitsü tenzüka liasü. Lai BOC Kohima aser J akhama tsüngda taxi anishir.

Abi Humtsoe ya M/S Naga Traditional Corner, Wokha indang kibur lir. La ya entrepreneur ka lir aser küm 15 tema sobaliba sobusolemtsü dak sendakba maparen inyaker. Lai talisa Lotha-N aga in dang sobusolemtsü nung temolung agütsür aser tetsür yartsüngsanger telok kar den külemi inyaker.

Arishi küm 81 tain Sibeule Zeliang ya 1987 küm mezüng election nung toktepba tetsür ka lir. 7 Peren AC nung lai Independent Candidate ka ama toktep saka tamakok nguaka lai maneni social worker ka ama inyaka aru aser tetsür aika yariogo. Sibeule-i tetsür 100 tema nem mapa agütsüogo. Sibeule-i tang 6 Ward Mdipuiram Chairperson aser 9 Ward Chairman, Union President, Peren town inyaker.

Iba sentong nung tetushi süa jaoker Commissioner & Secretary, Women Resource Development and Horticulture, Anenla T Sato-i o jembidang “loktiliba tejakleni aotsü atema nisung ajak tebilemtsü khuret kasasa lir aser tetsürtemi maneni kibong, loktiliba aser linük akangshitsü atema inyaktsü ayongzüker” ta ashi.

MykiFest-cum-International Women’s Day benjungmong nung shilem ka ama Department of Women Resource Development ajanga Prepared Speech aser Acrylic Painting tetoktepbatem ayongzüka agi.

Thuisemla Shanglai-i acrylic painting aser Lihzu Shiney Konyak-i prepared speech tetoktepbatem nung mezüngbuba jenjang takok angu.