Naga tsür ka tashiyim agi raksatsütsü merangba aitsür : Survival Nagaland

Dimapur, Dimapur, 9 (TYO) : September 2, 2015 nü Ilashpur, Karimganj, Assam nung alir Kabir Ahmed-i Naga tsür ka dak tim mesüi kongshiba aser tashiyim agi raksatsütsü merangba kukua aitsür, ta Survival Nagaland-i sangdong ka nung metetdaktsü.
Ozüng amertemi iba nisung ya ozüng tesashitiba agi merenshitsüla, ta SN-isa takhangba agütsüogo.
Iba nisung ket nung kulikaket maliasü aser pa ya Illegal Bangladeshi Immigrant ka asütsü akok ta temulung melemi bilemer. Ajisüaka, pa Kohima nung tetsükdaktsü kecha melii dang sademsasema liyonga aru aser iba ya asenok Naga nungertemi nisung mashishii dang anioka lidaktsüba ajanga lir, ta SN sangdong nungsa metetdaktsü.
Ozüng alema arua alirtemi asen Naga tsürtem dak tashiyim mapa inyakba ya joko maremzüktsü aser parnoki mapa inyaktsü aruba tenüng amer tasa tamajung atonga asen lokti nung yimjung samatsür, ta SN-isa ashi.
Naga nunger mapa mangur tem anioktsü nükjidong yur All Nagaland Taxi Driver Association-i ozüng alema arurtem manioktsü mepishir, ta Survival Nagaland-isa ashi.
Taxi amshiba mapa nung ozüng alema arurtem ta temulung melemi bilemer indang permit meyipa agitsüla aser ali kiburtemi, ki kiburtemi ozüng ozüng alema arur nem ali mesüra ki magütsütsü mepishir, ta SN-isa sangdong nung metetdaktsü.
Kohima Police aser Dimapur Police den külemi Nagaland nung mulungtet teloktemi asen litsüi ozüng alema arurtem mita noktangba atema tenüngsang agütsür. Iba denji külemi ozüng amertemi item nisungtem tanaben Nagaland-i marutsüsa ozüng tapet agi merenshitsü mepishir, ta Survival Nagaland-isa metetdaktsü.