Naga tsür ka tepsetba aitsür: CNTC ; Tanü rally nung adentsü ayongzüker

Dimapur, October 24 (TYO): October 23, 2017 nü Dimapur tiyongtsü nung Manipur nunger kati Naga tsür ka tepsetba khukhua aitsür, ta Central Nagaland Tribes Council (CNTC)-i ashi.
Nagaland nung aliba non-Naga nunger aser bendangertemi Naga nunger mezüngmeshi masütsüla, kechiyong onoki maremzükteti mapa inyakra nenoki metizüktsü, ta CNTC-i sangdong ka nung metetdaktsü.
Kechi kuli nung ajemdaker südir süaka, ozü Naga adianutsürtem aser jalatem yamai onok tenük agi ngua bendanger nem metepsetdaktsütsü, ta parnokisa shisem.
Kechiba non-local aser bendangertemi asen lima nung asenok akhüm metsübur ta Naga nungertemi shisadangtsü mapang ka lir. Tang atalokba lendong ya Naga nunger ajak mezüngmeshiba aser maaksüdaktsüba inyakyim ka lir, ta CNTC-isa ashi.
Asen state nung tetsürtem dak tashiyim agi shi nung medemba aser tepsetba lendong kanga bulua ataloker. Iba ya ajanga asen tarutsü nükla sayur. Naga nunger ozüng amertem, civil society tem, arogotem, linük tenzükertem aser kecha meinyakertemi item tatalokbatem ajanga asen lima tia shisadangtettsüla, ta parnokisa ayongzük.
October 25, 2017 nü Lotha Hoho, Dimapur-i ayongba rally nung Naga nunger ajak adentsü mepishia metetdaktsür. Rally ji asüngnep 9:00 ako nung Deluxe Point nung tenzüktsü aser iba nung asen Naga tsür tepsetba atema tejashi sayua sentong agitsü, ta CNTC-i ashi.
Maneni, ozüng amertemi Naga tsür tepsetsang bail nung mechioktsü tetuyuba agütsür, ta parnokisa shisem.