Naga tsür ka tepsetba atema lungkak aitba sentong agi

Bodbarnü Dimapur jila tiyongtsü nung aliba Deluxe point nung Naga nungertem adenshia Naga tsür ka tepsetba anema lungkak aitba sentong agidang tangokba noksa angur.

Dimapur, October 25 (TYO): October 23, 2017 nü Dimapur tiyongtsü nung Naga tsür ka tepsetba aija tanü Deluxe point, Dimapur nung lungkak aitba sentong ka ayonga agi.
Hombar anepdang Manipur nunger Rupak Singh-i Naga tsür Aleno Lotha tsüngset.
Tanü sentong nung telok balala nungi o jembirtemi, shia metetertem aliba Naga loktiliba nung iba ama tesempatsü mapa ya nisung ajaki aitsütsü aser aibelenerji ozüng tesashitiba agi merenshitsüla ta ashi.
Tanü sentong nung Eloe Ekung (Lotha) aser Naga Women Hoho Dimapur külemi sür Dimapur District Session Judge nem tezüluba nung takhangba ka agütsütsü bangzünga renem.
Parnoki takhangba agütsübatem rongnung, Arrla 302 nung ajemdaker Rupak Singh nem tasüba temerenshi agütsütsü, aji mesüra ozüng amertemi iba ken o ya ita ka tsüngda Naga sobaliba inyakyim nung angadangtsü atema agütsütsüla, ta shia lir.
Iba ken o nung lawyer mesüra yimten tsütsü nungi shingaia aibelensang bail nung chioktsü atema mesüra Eloe Ekhung aser Naga Women Hoho Dimapur dang nungi temelaba magii tasüba nungi taküm piyong tepuokdak ayutsü temerenshi agütsütsü asoshi memelenshitsüla, ta tezüluba nungsa shia lir.
Tasür kibong aser chirnurtem meinprongba nungi kümzüka ayutsü atema police security agütsütsüla aser social media nung iba tatalokba ya osang tai mebelenshitsü atema ketdangsertemi azüoktsüla, ta Eloe Ekung aser Naga Women Hoho Dimapur nungeri agütsüba tezüluba nung metetdaktsüogo.