Naga tsür teshimtet telok kati Dr Jitendra ajuru

New Delhi, January 18 (Agencies): Tanü New Delhi nung Manipur nungi Naga tsür teshimtet telok kati “Women for Just-Peace” tentet tenüng nung Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh ajurua tesem nung yimjung atema mepishiogo.
Minister nem agütsüba temepishiba shidi nung parnoki, Dec. 8 nü Manipur sorkari district tasen tenet tentettsü sangdongba sülen tanen makai mepetmesü lir aser mokdangba lir, koba ajanga nüburtem kanga timtemdar, ta shia lir.
Naga nunger aser tetsürtemi iba mepetmesü tembangtsü atema lenmang bushidaktsüner, kechiyong ibaji ajanga state nung yimchiyimjung mejungi raksar, ta parnokisa metetdaktsü.
Parnokisa, Manipur sorkar mesüra United Naga Council (UNC)-i agiba meratem tebendang makai, sensotemi tetsükdaktsü aser timtem balala ajuruba den state-i arurtemi timtem ajuruba ya tekaraba nung tembangtsüla, ta ashi.
Tang state nung telok balala tsüngda mepetmesü aliba ajanga rara aser longkak aitba atema tebilemtsü akar, aser tesünep atema iba ya bentettsü nüngdak, ta parnokisa ashi.
Ano tanga temepishiba ka nung parnoki, Ato kilonser, Narendra Modi lenisüba kija ajanga Manipur nung tesünep aser akhümtsübutep alitsü atema inyaktettsü ta tamang akar, ta metetdaktsü.
Dr Jitendra Singh-i tetsürtem denji süoki ia shisalemsatep aser pai, Manipur state nung tesünep bener arutsü aser azükaru atema sorkari inyaktsü mulunga lir, ta metetdaktsü.
Iba telok nung züngsemtemji- Linda Newmai, Dr Gina Sangkham, Dr Achan Mungleng, T. Ningreichon, L. M. Tabitha, Thingreiphi aser Wang Hring nunger liasü.