Naga tsürtemi 33% nungi masetshii nokdaker

Kohima, December 22 (TYO): Naga Hoho aser Eastern Nagaland Public Organisation (ENPO) den tribal teloktemi Naga Mothers’ Association (NMA) dang 33% shilem meshiba meyipa agiang ta mesüzüktsü merangaka, NMA kübok Joint Action Committee on Women Reservation (JAWCR)-i Urban Local Bodies election nung Nomination masü saka tokteptsü ta asüba tenangzükba nungi masetshir.
December 12 nü Japfu Hotel Kohima nung Naga Hoho aser ENPO den NMA o JACWR senden ka amen aser iba nung Municipal elections aser tetsür nem shilem lemzüktsüba indang onüktem benoka olemtep, ta NMA president & Convenor, JACWR Abeiu Meru, aser Co-Convenor, JACWR Dr.Rosemary Dzuvichu nati sangdong ka nung ashi.
Iba senden nung kin balala nungi tetsür lenir 38 tashi aden.
Senden nung NMA aser JACWR adentsü jaokba atema Naga Hoho aser ENPO dang pelaba metetdaktsü aser Naga tsürtem nomination ajanga masü saka election nung tokteptsü renema lir ta jangjajangja metetdaktsü, ta NMA sangdong nung shia lir.
December 19, 2016 nü NMA, JACWR aser Tribe Hoho lennir balala tsüngda tanabuba senden ka amen aser iba ya Angami Public Organization ajanga acha-ayanga liasü. Iba senden nung Tribe Hoho President temi tetsürtem dang election masü saka Nomination inyakyim agizüktsü aser okadak ken o benoka meyipa agitsü mepishi, ta NMA-isa ashi.
Senden nung NMA, ENWO aser JACWR nung tetsür lennir 40 shi aden aser parnoki Nagaland Municipal First Amendment Act nung aliba ama tetsürtem temeten atema inyakaa aruba osang metetdaktsü. Tetsürtemisa sorkari tetsür nem shilem lemzükja election agitsü lemtetbaji kanga tongtipang lir ta senden nung ashi.
Naga tsürtemi Nomination masü saka Election ang shimer aser election agitsü anogotem sangdongba sülen, municipal election aser women reservation atema okadaki aoba alizüng atongtsü ta tetsür lennirtemisa Tribe Hoho tem dang metetdaktsüogo.