Naga tsürtemi Central Schemes tajangzüktem agitsüla: Kavita

Kohima, July 23 (TYO): Honibarnü Nagaland Angh kinüngtsü, Kavita Acharya-i Nagatsür tem dang, shisaliok, rongsenkettsüng aser yimtenren nung tetsürtem tashi itta alitsü atema Centre sorkar indang schemes nungi tajangzüktem agitsüla, ta metetdaktsü.
Mumbai nung amenoka aliba mulungtet telok,  Bharatiya Stree Shakti (BSS)-i ayongzüka Hotel Cimorb, Kohima nung “Skill Development and Empowerment of Tribal women” onük nung o lemtep sentong nung jembidang Angh, Acharya kinüngtsü, Kavita-i, “Asenok longjemer asen sasa tashi itshia asen lokti aser linük terenlok nung ajungkettsüdi, kechiyong asenoka (tetsürtem) tangar den kasa tajung lir,” ta ashi.
Tetsürtem shisaliok nung, rongsenkettsüng aser yimtenren nung tashi aittsü ajungshia lai, “Centre sorkar indang ‘Beti Bachao Beti Padhao’ project ya kanga tongtibang, kechiyong iba ya ajanga tetsür aser tebur naprong kasa jenjang nung züngshir,” ta ashi.
“Lokti aser linük tashi itshitsü atema tebur aser tetsürtem külemi longjemer inyaktsüla. Ibayongji shisaliok nung tashi angutsü atema tetsürtemji school-i yoktsüla,” ta laisa shisem.
Tetsürtem rongsenkettsüng jenjang dak sentakba nung lai, Ato kilonser, Narendra Modi-i  ‘Jan Dhan Yojana’ project tenzüktsüogo, koba ajanga sen poisa kata magutsüi bank account lapoktsü temeten agütsür. Iba project ajanga shishilembaba tilateri tenzüktsü atema angati insurance sen lakh ka,  sen 10000 loan agütsür, ta ashi.
Iba ya rongsenkettsüng nung tashi aitba lir aser tetsürtemi iba maongka agitsüla.
Yimtenren dak sentakba nung lai, Centre-i linük Temzüng yanglushia municipal aser zilla Parishad elections nung tetsürtem nem menden shilem asemsü nungi shilem ka wazüktsüogo, ta ashi.
Laisa, tetsürtem tashi aittsü atema longjemtsüla, külemi shisadangtsüla aser külemi longjemer inyaktsüla, ta ayongzük.
Kasa sentong nung St Joseph College Kohima, Associate Professor (Sociology), Medonuo Pienyü-ia jembia liasü.
BSS Nagaland Co-ordinator, Tasile Zeliang menden ser iba sentong agi aser North East Co-ordinator BSS, Sunita-i lokti pelaa agizük.