Naga tsürtemi Chief Minister den ajurutep

Dimapur, October 2 (TYO) : Deobarnü Nagatsür teshimtet telok kati Chief Minister T. R. Zeliang den ajurutepa tebilembatem lemsatep.
Züngsem 24-i akümba Joint Action Committee on Women Reservation-i Chief Minister den ajurutepdang, kin shia nungi tetsür telok Tirtemi pa dang pelaba tamaitsü sayua pei kin indang sü ka ka sempet agütsü.
“Chief Minister aser par Cabinet-i tetsür nem shilem lemzükja Municipal election agitsü telemtetba agiba atema kanga pelar aser Chief minister-i telemtetba nungi masetshitsü ta Naga tsürtemi amanger,” ta JACWR Convenor aser Naga Mothers Association President, Abeiu Meru-i senden nung ashi.
Naga Hoho dena kin Hoho balalai tetsür nem shilem lemzüktsü onük atema ola adokba süoki ia bilemer, saka nisung ajaki pei tebilemba lemsateptsü temeten lir, ta JACWR Co Convenor aser Advisor NMA, Dr Rosemary Dzuvichu-ia chief minister dang ashi.
Ajisüaka, iba ya temzüngi tetsür nem temeten agütsüba lir aser Chief Minister-i anir Cabinet o MLA temi kanga dang yongyaa aliba municipal elections agitsü lemtetba asoshi JACWR-i tenüngsang agütsür, ta laisa shisem.
“Tetsür teloktemi tetemjen aser mapa koktettsü tetsürtem ajiteta lir. JAC-i political party ajak dang tetsür candidate tajungtem shima toktepdaktsütsü asoshi mepishitsü” ta Dr. Dzuvichu-isa metetdaktsü.
NMA Advisor Abeni TCK-ia o jembidang, Chief Minister-i Naga nunger putiotsü nung tetsür asoshi otsüsütsü aketba telemtetba agiba atema tenüngsang agütsü.
Chief Minister T.R. Zeliang-ia ashiba agi, State sorkari telemtetba tagitsütembo agitsü aser elections agitsü mulungba tesemtem nung municipal election agitsü.
Paisa tetsürtem dang loktiliba jenjang tajungba akümtsü asoshi tebur den külemi yariteptsü mepishia metetdaktsü.
Tang Nagaland nung Rongmei onük asoshi mangatettep adoka aliba atema olen ka ashidang, iba telemtetba ya taoba Chief Minister aser taoba sorkar mapang agiba liasü aser tang sorkari iba onük atema Cabinet Sub Committee ka tentetogo, ta T.R Zeliang-isa metetdaktsü.
Tanü Chief Minister den ajurutepa teshimtet telok nung NMA ENWO, NWHD, Watsu Mungdang, Tenyimia Women Organisation aser Sumi Totimi Hoho, Angamimiapfu Mechu Krotho, Eloe Hoho, Rengma Mothers Association, Pochury Mothers Association, Chakesang Mothers Association, Zeliang Mepui Organisation nungi President tem dena liasü.