Naga tsürtemi India sepai nem rakhi mesüloktsüba aitsür: NMA

Dimapur, August 29, 2021 (TYO): Tawa Naga tsür kari Raksha Bandhan tenüng nung Indian armed forces nem rakhi mesüloktsüba inyakyim khukhua aitsür ta Naga Mothers’ Association (NMA)-i metetdaktsüogo.

NMA-i BJP Mahila Morcha national secretary Aienla Jamir aser Dimapur District Mahila Morcha president Avi Aomi nati anir züngsemtem aser kaketshir telok den Tamenglong nung tetsürtem dang ashishitep aketba sentongtem nung shilem agitsü melena Naga tsürtem den longjemtsü tayongzükba agütsüogo.

“Nenok ya chichiba Naga nunger süra aser Naga nunger meimertem süra, India sorkar aser Central BJP lennirtem dang AFSPA agientsü aser Assam Rifles dena Indian armed forcesi tashiyim mapatem inyakba atema temeten agüjang ta ola adoktsüla” ta NMA-isa metetdaktsü.

Armed Forces Special Powers Act (AFSPA) kübok Indian armed forces-i Naga nunger reshikangshia arur.

Taoba mapang India sepaitemi Naga tsürtem dak tashiyim agi shi nung medemba, tim mesüi kongshiba aser tashiyim mapa inyakba den ano yimtsüngtem ka küma lokteper lidaktsüba aser reshikangshiba inyakyimtem mamateti aliba mapang ka nung Naga tsür kari item sepai nem rakhi mesüloktsübaji maaksü lir” ta NMA-i sangdong ka nung ashi.

Naga nunger aliba tesemtem nung nübor AFSPA kübok ali tashi ibala inyakyim magizüker. India sepaitemi meimchir temeten alema inyakba atema temeten mengui bushitepa aruba mapang ka nung Naga tsürtemi sepaitem nem tetushi agütsüba magizüker. Küm aika tejakdang India sepai ket nungi takoksa ajuruba kibongtemi temeten meshia ola adokba manen lir aser parnok nem temeten ano magütsü lir” ta NMA-isa metetdaktsü.

1960 küm September 6 nü 16th Punjab Regiment-i Matikhru nung Naga nunger tepsetbaji Black Day lir aser tanü tashi iba anogo nung meimchir temeten alema inyakba bilemteta amonger.

Maneni, India sepaitemi Oinam aser temeket yimtsüngtem nung, Mokokchung, Pangsha aser Wuzu nung  ashiyim mapa inyakbatem mama lir aser takoksa ajuruba kibongtem den külemi mangyimer. Talisa, Naga tsürtemi 44 Assam Rifles, Tamenglong ajanga sangdong agütsüba magizüker, kechiyong parnoki tashiyim mapa inyakba reprangra sayutsüngi jenjang ka nung mali, ta NMA-isa ashi.

Raksha Bandhan anema noktakba ya sobaliba mesüra tamangba yimsü meputepba atema masü saka AFSPA kübok tetsür aser tanurtem dena Naga nunger alema mapa inyakba atema temeten magütsüba indang lir, ta NMA-isa metetdaktsü.