Naga tsürtemi silver medal agizük

Dimapur, October 07 (TYO): New Delhi nung ayonga agiba Thal Sena Camp (TSC) tetoktepba nung 1 Naga Girls Battalion NCC Cadet Wapangienla-i anir par teloki takok ngua shilem agiogo.
DGNCC-i ayonga agiba prangpong kashishitsü tetoktepba nung India ajunga nungi NCC kübok densemba Army Cadet-temi toktepa shilem agir aser GHSS Dilong nung class 10 nung azünger, Cadet Wapangienla-i aniba teloki NER Directorate tenüng nung shilem agia liasü.
Tan tetoktepba nung Cadet Wapangchilla-i gold medal agizüktsüsa kanga junga shilem agi saka lai Snap Shooting tetoktepba nung silver medal ang agizüktsüsa jenjang angu.
Ano külen, par teloki overall shilem nung bronze medal agizüka liasü.
“1 Naga Girls Battalion NCC nungi tetsür cadet-tem rong nung sempet tajung aliba nguogo aser tarutsü mapang Olympics tashi nung toktepa shilem agitsü maongka angutsüsa, NCC-i sempet akartem ajungmesoa anitettsü nangzüker,” ta tan takok ngua shilem agiba osang angazükba sülen Nagaland NCC nung Group Commander, Brig. MS Nikam-ia metetdaktsü.
“Nagaland Youth Resources & Sports Directorate (YR&SD) kübok NCC ya lanurtemi pei sempet alima dang sayutsü sabang tajung ka akümtsü tenzükogo aser iba atema YR&SD nung Director, Asangla Imti nem tenüngsang agütsür,” ta pai shisem.
Cadet 600 shi atema Kohima kübok St Joseph College Jakhama nung tan October ita 26 nü nungi November ita 5 nü tashi agitsü ayongba NCC camp nung tan takok angurtem nem sempet agütsütsü renema lir.