Naga United yim tashi bus meshir

Dimapur, July 23 (TYO) : Tawa Dimapur nung referral hospital anasa Chathe ayong temdangba apu chirepba ajanga nübortem tesenzüdak maka kanga timtema lenmang talang mekendoka Patkai College ajanga senzüdagi.
Iba apu ajanger United Naga yim den ano iba apu ajanga senzür yimtsüng noklang tema liasü. United Naga yimtak kija nung Govt. High school ka, private school asem aser college ka lir. Tang kaketrejutem meyi sodi anguba ajanga tera mulung anisüngzüker saka joko anogo ishika tsüngda kaketrejutem lapoka aotsü aser idangji kaketshirtem senzüsenpongtsü timtem tulu adoktsü alinungji, PWD (R&B) department aser administration-i tekaratiba nung ayong adena senzütettsüsa inyakdaktsüner aser Naga United yimtsüng tashi tekaratiba nung bus ka agüjang ta Naga United Village Ao senso Telongjem ajanga metetdaktsüogo.