Naga Wrestle Mania 5 mapang melenshir

Kohima, August 01 (TYO): Nagaland Wrestling Association (NWA) den lungjemer 3E Nagaland teloki ayongba Naga Wrestle Mania 5 (King of The Ring Series 2016) asayamong mapang melenshiba osang ka 3E teloki tanü sangdong ka ajanga metetdaktsüogo.
Angami Youth Organisation (AYO) Silver Jubilee benjungmong amongba ajanga Wrestle Mania tetoktepba mapang melenshia, taküm October ita 27-29 nü tashi Kohima kübok Kohima Local Ground nung agitsü renemogo.
Iba tetoktepba nung shilem agitsü jangrartem asoshi shilem agitsü shiti tanü, Hombar nü nungi tenzüka, Orchid store, Razhü Point Kohima; Sportsworld, Taxi Stand, Kohima; Tiara Restaurant, Chumukedima; Youth snooker cafe & restaurant, Jalukie; Zupo book house & stationery Chozuba; Bingo Madgle shop, Chetheba; Life Centre, Pfutsero aser Town Junction, Tadubi nung sen 20 yong ayoktsü tenzükogo.
Tetoktepba nung shilem agir senior melangteper nungi taa sen 500 aser junior melangteper nungi sen 200 agitsü renema lir saka Angami, Chakhesang, Zeliang aser Poumai kin dak alaka, tanga kin nungi toktepa shilem agitsü jangrar melangtepertem nungibo shilem agitsü taa sen magitsü renemba osang ka kasa sangdong ajanga metetdaktsüogo.
Ano külen, tetoktepba nung shilem agitsü shiti taruba September ita 1-30 nü tashi 3E Office, UBC anasa agizüktsü renemba osang ka par tentetisa metetdaktsüogo.