Naga Wrestling temaba jenjang nung ajungkettsütsüla: T R Zeliang

25 buba NWA Naga Wrestling Tournament wako Kohima Local Ground nung salatsüba sülen Nagaland Chief Minister, T R Zeliang; Speaker Chotisuh Sazo; Cabinet Ministers aser NWA ketdangsertemi arok noksa agitsü atema külemi nokdaka ataba noksa nung angur. (Kohima, March 10)

Kohima, March 10 (TYO): Naga nunger yimya nung melangtepba tetoktepba temaba jenjang nung ajungkettsütsü tajungshiba olen ka Nagaland Chief Minister, T R Zeliang-i tanü, Brehostibar nü metetdaktsüogo.
Tanü Kohima kübok Kohima Local Ground nung agiba Nagaland Wrestling Association (NWA)-i ayongba Naga Wrestling Tournament (NWT) asayamong küm 25 ajungba sentong nung o jembidang, tongti tesemdanger, Zeliang-i iba olenji metetdaktsü.
“Naga nunger, talisa Tenyimia kin atema Naga wrestling ya Naga nunger sobaliba saisapongtsü shilemtem rong nung tongtipangtiba lir,” ta shia, freestyle wrestling dang nungibo Naga wrestling tetoktepba reprangtsü tajungba aliba olen ka tongti tesemdangeri lemsatepa liasü.
“Naga yimya nung melangteptsü asoshi tashi den tasa nungdaker aser yiruyibonga ajema ajurur. Naga wrestling nung tanga wrestling tetoktepba ama ochimashi inyaktsü maongka kanga dang ajema angur. Anungji, Naga wrestling temaba jenjang nung ajungkettsütsü nungdaker,” ta pai shisem.
NWA-i NWT asayamong küm 25 tashi ayongba atema pelaba olen ka lemsatepba den külemi, Zeliang-i tesüiba aser tang NWA ketdangpur nem tetushi agüja liasü.
Ano külen, Phek district kübok Yoruba nunger arishi küm 30 tain Vechita Khesoh 25 buba NWT champion akümba osang jangjaogo.
Pa sülen anidaka, arishi küm 30 tain Vekuzo Vezhü, arishi küm 32 tain Sürhoneyi Soho aser arishi küm 30 tain Keduovilie Zumu nungeri 2 buba, 3 buba aser 4 buba jenjang ajangzüka liasü.
Vechita-i takokba nangri den senpet sen lakh 5 aser Vekuzo, Sürhoneyi aser Keduovilie nungeri senpet sen lakh3, lakh 2 aser lakh 1 agizük.