Naga yimjung tezüngzüktep nung NE CM tem sentok: Congress

New Delhi, August 07 (Agencies): Naga yimjung tezüngzüktep asoshi inyakba mapang Centre sorkari Northeast Chief minister tembo sentok, ta Congress-i maneni BJP sorkar aitsüogo.
Congress-i, Thuingaleng Muivah aser Isak Swu nati aniba National Socialist Council of Nagaland (NSCN-IM) den tezüngzüktep ajanga kongshiba state tem tangatetbabo magi-i Centralized yimya ka nung sign süogo, ta ashi.
Hokolbar nü osangbenertem senden ka nung jembidang Congress-i tesem nung chief minister tem den tezüngzüktep nungji o lemtep makaba atema Ato kilonser Narendra Modi aitsüogo. “Ato kilonseri kongshia aliba state asem – Arunachal Pradesh, Assam aser Manipur Chief minister tem den melemtepbaji cooperative federalism principles alema inyakba lir,” ta party otongdar Randeep Surjewala-i ashi.
Cabinet minister Nirmila Sitharaman aija Congress lenirisa, “Tejashitsü tulubaji, yashi Nirmala Sitharaman-i, onük lemteptsü atema Chief Minister asem jaokogo, saka parnoki memulung ta jembiba ajanga lai linük dang osang tai shiogo,” ta ashi.
Surjewala-isa, Naga yimjung tezüngzüktep dak sentakba nung sorkari kecha mashi, iba den tebang agi mesüra tezüluba nung kecha memetetdaktsü, ta ashi.
Congress-i aitsüba ya Nagaland Chief Minister T R Zeliang-i jembiba olen ajanga-a terabo medentsür, kechiyong T R Zeliang-i, iba tezüngzüktep nung onüktemji state sorkari meteta mali, ta ashi. Aji oda süaka Zeliang-isa, iba tezüngzüktep agiba pela agizüka, iba telemtetba ya otsü ka lir aser tesem nung mapang talangka atema yimjung asoshi mera agiba ka lir, ta shiogo.