Naga yimten asoshi inyakba mapa nung takok nguogo: Rio

Dimapur, November 7 (TYO): Naga nungeri küm aika yimten atema inyaka aruba ya tamakok masü saka takok anguba otsü ka lir, ta Lok Sabha MP, Neiphiu Rio-i ashi.
Naga nunger putiotsü, sobaliba, maitsü aser inyakyim agizükba ya kanga dang tulu ka ajangzüktetba lir. Talisa, Naga nunger tebilemtsü ya yimten tebilemtsü ka ta agizükdang asenok ajak longjemtsüla, ta paisa ashi.
Wokha public ground nung Tokhu Emong benjungmung nung tongti tesemdanger o jembidang Rio-i iba onük jembi.
Tawa tu Chief Minister TR Zeliang-i anir Cabinet züngsemtem den pa dena Prime New Delhi nung Minister’s Office, Union Home Minister, Interlocutor, National Security Adviser, NSCN (IM) lennirtem aser NPGs 6 indang Working Committee den ajurutep, ta Rio-isa ashi.
NSCN (IM) aser Working Committee nati India sorkar den yimjung olemtep agiba atema tenüngsang agütsür. Iba mapa ya kanga tajung anungji Naga nunger ajaki iba mapa asoshi sarasademtsütsüla aser pusema nungittsüla, ta Lok Sabha MP-isa ayongzük.
“Asenok tebilemba nung, lokti nung aser yimten nung amalitep lira, Naga nunger külemi longjemba mapangji ajurutsü. February 2018 nung General Assembly Election matongdang Naga yimten latetnür aser ibaji onok sarasadem lir. Onoki India sorkar dang iba tebilemba shiogo aser NSCN (IM) o Working Committee nungia parnok tebilemba angadangogo. Telemtetbaji mengutetra General Election thinentsü atema asenoki jembitsüla” ta Rio-isa ashi.
“Asenoki sobaliba benjungtem ya kanga dang pelatepa aser longsotepa amunger, ajisüaka asenoki benjungji chichiba tanüla nung amungtsü atema asenok dak yimjung aser tesünep, anema aser rongsen jenjang tajung alitsüla. Item ya ajanga nisungtem azükarur. Nagalang ya yimjung aser azükaru lima ka südaktsütsübaji Naga nunger ajak pungmang ka lir” ta paisa shisem.
“Wokha District ya molamoshia aliba lima ka lir. Iba district nung azüngtsü-zülutsü metetba jenjangji 90% lir aser Dimapur District sülenbo sen teimba anguba district ji Wokha lir. Lotha nungerji lennirtem lir aser tanga Naga kintem asoshi iba district ya tatishitsü tajung ka lir” ta Rio-isa ashi.
British nungeri asen lima nung tetsüng ajemokdang nungi Lotha nunger ajitet. 1976 küm British nungeri Naga Hills nung administrative centre ka lapok aser ibaji Wokha nung liasü ta putiotsü nung shia lir. Ibaji ajanga asen putiostü akaba sayur, ta paisa shisem.
Tanü sentong nung Parliamentary Secretary Er. Kropol Vitsu, Parliamentary Secretary Dr. Longrineken, parliamentary Secretary Dr. Neiphrezo Keditsu, Ex-Minister Dr. Chumben Murry, taoba MLA R. Khing aser party lennir aikati Lok Sabha MP, Rio meina aru.