Naga yimten asoshi yimtsüng nung telemtetba agitsüla: S.Chuba Lkr

Tuli,Jan.16 (TYO): Tuli nung January 12 aonung nungi tenzükba Langpangkong Kaketshir Mungdang (LKM) 31 buba Lokti senden aser Saisapong sentong yasüng Hokolbar aonung tembangogo.
Iba lokti senden tatembangba sentep sentong nung tetushi tejaoker, Parliamentary Secretary, Wb.S.Chuba Longkumeri jembidang, Naga yimten tebilemtsü ya kokteta telemtetba kati arur yimjung nung alitsüsa Naga nunger yimtsüng ajak nung pei pei sasep nung senden lia telemtetba agitsüla, kechiyong Naga nunger yimten tashi ajak yimtsüng dak dang keta lir, ta metetdaktsü.
Rongsen aser temetetba jenti liaka yimjung melira kecha masü, anungji ajaki yimjung bushitsü nüngdaker ta paisa shisem. Nagaland nung yimtsüng ajak agi 1143 lir, anungji item yimtsüng shia nung senden lia Naga lima nung yimjung alitsü asoshi telemtetba agitsüla ta S.Chuba-isa metetdaktsü.
Kaketshirtem ajungshia o ka ashidang, tanü putu nung kaketshir ka dak awashi, sobaliba aser Tsüngrem metetba shisatsü aser jakla yimya alitsüla ta paisa ashi.
Paisa LKM-i saisapong aser lokti senden aliba mapang tongti tesemdangertem nungi senotsü teyari kecha meimlai parnok sasa Corpus Fund tenteta yur, iba sen nung jagi dang nüngdak ajak inyaka takok anguba asoshi pelaba metetdaktsü.
Kasa sentong nung District & Session Judge, Mon Wb.Mayang Limai tajungshi o jembidang, Tuli ama lenden lima nung ya nisung aika arua teimba aser tuluba küma renloktsüsa Tuli nung ali kiburtemi tangar nem ali agütsütsü aser ayoktsü nungnanga mebilemtsüla, ta metetdaktsü.
Paisa lanurtem dang tanü putu nung inyakyim ajak meteta temoatsü aser tajangzük agitettsü atema tanishir tajung nüngdaker, anungji tanishir tajung shimtettettsü atema election mapang nübortemi pei vote meyoki timi shilem agitsü asoshi tangatetba agüja tang yongi inyaktsüla ta metetdaktsü. Iba maparen nung LKM-i anir temelenshi tajung bener arutsü imlar ta paisa tayongzükba ka asütsü.
Ano, kasa sentong nung PA -Mokokchung DC, Wb.Temsümeren-ia tajungshi o jembidang, tanü kaketshirtemi saisapong aser kaket azüngba nung dang masü saka sobaliba nunga kasasa temulung agütsütsü ajungshia liasü.
“Aor Dobashitemi Aor Sobaliba temzüng ozüng kaket ka adoktsü. Idakji tetsür senmang aser kibalemburen indang alitsü, anungji yimtsüng shia nung pei pei kidongi shir  den kibalembutsü akoker, itemji tadongi zülur Dobashi court nung agütsütsüla,” ta paisa metetdaktsü.
Iba kasa sentong nung LKM dak sendakba inyaka aruba aser inyaka aotsüba mapatem indang osangtem benoka o lemtepba mapang liasü.
Ano, kasa sentong nungsa Planning Committee, Merangkong Convener, Wb.Marsanen Imsong aser LKM Planning Committee nung Convener Wb.S.T.Nokdang nati teyaritepertem ajak dang pelaba metetdaktsü.
Iba sentong nung Wb.Temsükaba telok aser Mungdang choir nati ken tajung kaka tena liasü.
Taruba LKM 32 buba lokti senden aser saisapong sentong 2019 küm Akhoya nung alitsü.