Naga yimten atema tangar den jembitsü tang mapang tajung : PWC

Kohima, Feb. 25 (TYO) : Tawa Nagaland nung yimsüsürtem oagi Delhi aser Kolkata nung yimten lenir balala ajurua Naga yimten tebilemtsü tatar hoho nung benoka jembiba mapang yaridaktsüner ta shia senzübaji nübortemi memeteti tapi agi inyakba mapa ka asütsü ta aija Naga yimten telok pongoi metetdaktsüba ken o ka tanü Parliamentary Working Committee tenüng nung Nagaland speaker aser Chief minister nati telangzüba agütsüogo.
Iba telangzüba nung, Nagaland speaker, Wb. Chotisuh Sazo aser Chief minister, T.R.Zeliang nati ashiba agi, election shia Nagaland nung yimten telok ajaki Naga yimten tebilemtsü ya tatem küma latettsüsa inyaktsü asoshi nangzüker. Iba tenangzükba ya Naga yintem tebilemtsü latettsü asoshi India den jembidak senden nung dena shilem agitsüba masü saka yariteptsü asoshi lir, anungji nübortemi shimtetba yimsüsürtem ama Naga yimten tebilemtsü latettsü asoshi khuret abentsübaji tim dang asütsü. Iba nükjidong atongtsü atema Nagaland Legislative Assembly nung opposition mali kümogo ta parnokisa ashi.
Tenatisa ashiba agi, tang India nunger yimten yimsüsürtem ajurua Naga yimten tebilemtsü latettsü atema yaridaktsüner ta shia senzübaji mapang matongdang senzür masü saka mapang shitak nung senzür asütsü, kechiyong kodang Naga yimten ken o benoka jembitsü südir, idangjibo mapang mangutsüa akok ta parnokisa ashi.
Yaküm 2015 küm August 3 nü India sorkar o NSCN-IM na tsüngda Naga yimten ken o latettsü asoshi renemba indang ashidang, ” iba terenemba ken o ya tongmelang ka agi Naga yimten ken o tekaratiba nung latettsü asoshi tangatettep nung inyaktsü ta tamendakdak ken o ka renemba ka dang asütsü ta onoki angatetter, anungji India nunger lenirtem dang Naga yimten ken o tatar senden nung benoka jembidang yariang ta ashibaji tapi agi jembiba o kabo masü ta parnokisa metetdaktsü.
Naga yimten ken o tatembang küma latettsü asoshibo India sorkar-i Naga nunger yimten telok aser tongtibang lokti tentet aser PWC purtem dena ajak den ajurutepa shisalemsateper külen dang latettsü imlar ta parnokisa ashi.
Kasa tebilemtsü onük nung yaküm July ita nung India Prime Minister, Home Minister, Minister of State for Home aser Naga yimten tebilemtsü indang jembitsü shimba Interlocutor, Ravi nungertem ajurua liasü aser taküm küm Amit Shah, BJP President, Sonia Gandhi, Congress President, Shri Sarad Yadav, President JD(U), Shri Anand Rai Absul, Siv Sena Parliamentary Party Leader in the Lok Sabha, Shri Dinesh Trivedi, Trinamul Congress MP aser Th. Muivah, Ato Kilonser, NSCN (IM) nungertem ajurua liasü.
Tawa Nagaland nungi PWC nung adener yimsüsürtemi Delhi aser Kolkata nung India nunger yimten lenirtem ajurua senzüba mapa aitsür teloktemji GPRN/NSCN(Khole-Kitovi), NNC/FGN (S.Shingnya-Zopra Vero), NNC ( Z.Royim-V.Nagi), NNC (Kiumukam-Hangping) aser NNC (Temjenyanger-Hozheto) nungertem liasü.