Naga yimten ken o tekaraba nung latettsü asoshi PWC-i PM Modi ajurutsü

Kohima, July 06 (TYO) : Tanü Committee of Nagaland Legislators Forum on Naga Political Issue-i teshimtet telok ka Ato kilonser Narendra Modi aser Centre nung lenirtem dangi yoka parnok dang küm 60 dak tema Naga yimtenren ken o tekaraba nung latettsü atema mepishitsü asoshi lemtetogo.
Assembly Conference Hall nung Nagaland Legislators Forum indang Parliamentary Working Committee (PWC) mezüngbuba senden nung iba telemtetba ya agia liasü, ta Assembly Secretariat nung ketdangser kati ashi.
Committee-i parnok teshimtet telok ka Delhi-i yoka Ato kilonser dak alia Naga yimjung ken o nung interlocutor den Union Home Minister ajurua yimjung asoshi telungpur telok ajak den ceasefire yanglutsü benokba den külemi tekaraba nung Naga yimtenren ken o latettsü asoshi mepishitsü atema Committee-i lemtetogo.
India sorkar aser NSCN(K) na tsüngda ceasefire agienba asoshi tebilemtsü kaa Committee-isa state nung tribal tentet – Naga Hoho aser Eastern Nagaland People’s Organisation dang, PWC-i union sorkar aser NSCN(K) na tsüngda tanaben ceasefire tezüngzüktep agitsü asoshi mepishibaji mulungtet teloktem den lemteper teshimtet telok ka NSCN(K) Mendenbuba, S Khaplang dangi yoktsü asoshi mepishitsü telemtetba agiogo, ta ketdangserisa ashi.