Naga yimten khuret atema tebilemba lemsatepang: TR Zeliang

Deobarnü Peren nung UNWTO World Tourism Day sentong agidang Chief Minister, T.R. Zeliang  den par cabinet züngsemtem aser tanga ketdangsertem külemi agiba noksa angur.

Dimapur, September 27 (TYO): Tekaratiba nung Naga yimten tebilemtsü asoshi nisung ajaki agizüktettsüsa telemtetba ka agitsü atema Naga nungertemi pei tebilembatem lemsatepang ta Deobarnü Nagaland Chief Minister, TR Zeliang-i ayongzük.
Tanü Peren nung UNWTO World Tourism Day amungba sentong nung TR Zeliang tongti tesemdanger liasü. 1980 küm United Nations-i küm shia September 27 nü World Tourism Day amungtsü sangdong aser yamaji mungyonga arur.
Nagaland nung yimjung mali tashi tourism tsütsü terenlok malitsü, ta tanü TR Zeliang-i ashi.
“Taküm August 3 nü teinyaktsü sentong lateta tenangzüktep agiogo aser tang asenoki iba tebilemtsü asoshi telemtetba tajung ka agitsü atema tebilembatem lemsateptsü mapang lir” ta paisa shisem.
“Naga yimten tebilemtsü atema shilem agidang Naga nungertemi tangatetba tajung yur inyaktsüla. Nagaland nung yimten telok balala nungi yimsüsür 60 prongla külemi longjemer India sorkar dangi ola yokteter süra, kodaser Naga lokti nung shilem balala melongjemteter?” ta Nagaland chief minister-isa asüngdang.
Nagaland nungi MLA 16-i akümba telok kati New Delhi nung India prime minister, Narendra Modi den ajurutepdang, pai Naga yimten tebilemtsü atema asenok longjemba ngua pa mulung nung kongshiba lemsatep, ta TR Zeliang-isa ashi.
Naga nunger yimten teloktem aser India sorkar tsüngda joko küm 16 den timba olemtep liyonga arur. Asenok Naga nunger khenyongi balaka, asen lipok otsü aser sobaliba khenyongi balaka aser itemji kümzüka ayutsü atema asenoki kanga junga bilemdanger ang telemtetba agitsüla. Anungji Naga nunger lokti ajak külemi longjemer asen tebilembatem lemsateptsüla, ta paisa ayongzük.
TR Zeliang-isa Sikkim atishia jembidang, “Sikkim nung tensa junga aliba ajanga tourism industry kanga renloka aoer saka külen tobur tajung Jammu & Kashmir reprangi aotsü atemabo tourist tem aiben bilemdanger” ta ashi.
“Iba denji medemdanga asen state nung Naga yimten tebilemtsü atema telemtetba monguteti lira aser national media-i asen state ji telungpurtem aliba state ka ta dang osang prokshira, asenoki eco & cultural-tourism ajungkettsü merangaka tajangzük mangutsü” ta Nagaland chief minister-isa metetdaktsü.
Tanü sentong nung Minister tem ronngnungi Y Patton, Tokheho Yepthomi aser Kipili Sangtam aser Parliamentary Secretary tem nungi Tohanba, C. Apok Jamir, Jacob Zhimomi, Eshak Konyak, Dr Longri aser MLA Namri nungertem den sorkar ketdangsertem aika aden.