Naga yimten koma latetdaktsüner ta Indiai asüngdanger : Nuklutoshi

Kohima, July 28 (NEPS): Naga yimten tebilemtsü ya koma latetdaktsüner ta Indiai asüngdanger saka asenoki India nungi dang telatetba ka meshia akanger, iba jagi telatetba kati arutsü asoshi mapang agir ta tanü National Highways minister, Wb. Nuklutoshii metetdaktsü.
Naga yimten jembiba yimya ya Naga nungertemi angatettsüsa mejembir, anungji India nunger temaba menden nung alir lenirtemi jembiba o temji tongmelang küma mangatet tashi, parnok tebilembaji asenoki mangutsü ta paisa metetdaktsü.
Iba osangbener den tanü Mongolbar nü jembidang, Wb. Nuklutoshii ashiba agi, tawa parnok Parliamentary Working Committee (PWC) purtemi Delhi nung ato kilonser Narendra Modi ajurua jembidang, “Nenoki 100% imlar, saka ni 80% dang agütsüra, iba jagi ni tanüngba 20% ji magütsütsü ta masü.” “Ni nenok nem telatetba ka agütsür, nenoki aji magizüktetra, ibajiang ano tebilemtsü tuluba akümtsü.” Naga nungertemi ni kechi agütsüdir agizüktsü renema lir asü ?” ” Kodang ya atalokdir, melatettetibo meyutsütsü. Kodang yimjung arudir, ajak nung yimjung alitsüla. Naga nunger shiaji telemtetba agitsüba mapa nung tongtibang asütsü,” ta Narendra Modii shia liasü.
Naga yimten tebilemtsü ken o jembitsü asoshi züngsem 19 agi akümba Parliamentary Working Committee (PWC) ka tenteta lir aser parnoki tawa kasa tebilemtsü ken o bener Prime Minister Narendra Modi, Home Minister Rajnath Singh aser Interlocutor RN Ravi nungertem Delhi nung ajurua jembiogo.
Wb.Nuklutoshii ashiba agi, ato kilonseri ashiba otemji angatettsü tasak, anungji ibaji nübortemi angatettsüsa jembitsüla aser yimtak yimtsüng nung alirtem den telongjem nung alitsü jembidaktsüner.
Ato kilonseri ashiba otemji rasaa angatettsü merangtsüla, kechiyong pai asüng asenok den mejembii pai mulungba nung telatetba ka bener arua agütsüra, ano ibaji 16 Point Agreement amato ka dang asütsü ta Nuklutoshiisa metetdaktsü.