Naga yimten latetba agi Assam arrtsü memelenshitsü: Rajnath

New Delhi, October 26 (Agencies): Naga nunger linük tenzüker teloktem den Naga yimten tebilemtsü tatembang küma telatetba ka dangi aruba agi Assam arrtsü memelenshitsü ta Union Home Minister Rajnath Singh-i Assam Chief Minister Sarbananda Sonowal dang metetdaktsüogo.
Iba osang ya yangi Assam Chief minister Sonowal-i Union Home minister ajurua jembidang metetdaktsü. “Tena ajurutepa jembidang ‘Nagalim’ (Greater Nagaland) onük dena süoka jembiogo aser Union home minister-i chief minister dang kechisüdir süaka Northeast nung tang aliba arrtsü ya memelenshitsü government tangatetba lir ta shiogo,” ta Assam government sangdong ka ajanga metetdaktsü.
Naga nunger yimten nüchiso bushir telok rongnung NSCN-IM den Centre government-i Naga yimten tebilemtsü ken o süoka jembia arur aser yakta telemtetba ka dangi arutsü ta angazüker. Naga yimten tebilemtsü latettsü atema Naga nungertemi akhangba onüktem rongnung Arunachal Pradesh, Assam aser Manipur state kübok Naga nunger aliba tesemtem ajak Naga yimten küboki aittsüla ta takhangba agüja lir.
Ano, Sonowal-i Union Finance Minister Arun Jaitley ajurua jembidang, Assam aser Northeast nung aliba state-tem atema ‘industrial policy’ tasen ka yanglua metetdaktsütsüla ta shia liasü. Sangküm 2018 küm February 3 aser 4 nung Guwahati nung Global Investors’ Summit ka alitsü ayongzüka lira ser iba senden madong dangsa iba industrial policy tasenbaji metetdaktsür alitsüla Sonowal-i Jaitley dang shiogo.
Sonowal-isa Jaitley dang tzümetsüng ajanga timtem takoksa bener arutsüba mapatem repranga anepalutsü asoshi yaktasa sen crore 1,138 agütsüdaktsüner, ta metetdaktsü.