Naga yimten latetdak Naga nunger ajak adentsüla: S.C.Jamir

Dimapur, Aug.11 (TYO) : Naga nunger tarutsü putu nung yimjung nung jangratema lidaktsünüba agi taoba putui taküm tenla dena agüja inyakogo, anungji kodang Naga yimten telatetba kati arutsüsa inyaktsü mapang arudir, idangjibo Naga nungertem den Naga nunger linük tenzüker telok ajak aser state sorkar dena adentsüla, ta taoba Nagaland Chief minister aser tang Odisha nung Angh Wb. Dr.S.C.Jamiri metetdaktsüogo.
Tan August 3 nü India sorkar o NSCN-IM na tsüngda yimjung ken o ka renemba jagi Naga nungertem rongnung yimten tangatetba indang jembi tenzükogo, aser NSCN-IM teloki tamalenbo India den Naga yimten ken o ya tangar lima bendanglen ka nungang jembitsü ta kanga sashia nokdaka aliba nungi asepzüka aluba jagi parnok tsüngda lenji arutepa jembitsü mulungtetogo ta sayur aser iba jagisa yimten nung kechi takoktsü, iba indang jembitsü asoshi rajema aruba tamaitsü tajung ka sayur ta paisa ashi.
Ajisüaka, tangbo India sorkar o NSCN-IM na tsüngda zülutepba nübortemi memetet anungji kecha ashitsü madoker, anungji tangbo parnoki lemtetba ken o ji nübortem asoshi ayong mangu aser ango indang jembir amai asütsü, ta paisa ashi.
“Kodang 16 Point Agreement India sorkar den renem, Naga nunger kin ajaki sign asü aser iba jagiang Nagaland state balaka angu aser India temzüng arla 371 A nung Nagaland jenjang balaka nung ayu,” ta Wb.Dr. S.C. Jamirisa ashi.
Naga nunger küm aika tashiyim amshia azütokshia aliba tensa tia tatem küma arudaktsütsü asoshi Naga yimten nüjiso bushiba maparen nung tasaktiba onük ana ka Sovereignty aser kaji Naga nunger alushi ajak yimten ka kübok alitsü ta asüba onük anaprongla agiener amai bilemer. Ibaji shitak süra tanga India temzüng küboksa alitsüsa Naga yimten latettsütsü südi ta bilemer, ta paisa ashi.
Naga nunger yimten tebilemtsü ya kobatetka tekaraba nung latetdir patekaji tajungba asütsü. Naga yimten telatetba kati arutsü asoshi tasü itta tenzükogo, anungji tangbo ajaki tajung bilema yariteptsüla, ta Dr.S.C.Jamirisa ashi.