Naga yimten latettsü asoshi

Nagaland nung election aru shia Naga yimten tebilemtsü latettsü indang kanga süoki ia jembir saka election temerbo yimten teloktem tsüngda kati ka aitsütepa jembiba dak alaka Naga yimten tebilemtsü indang shisabolua jembibo mangashir. Kasaji, taküm küm election agitsüba mapang nunga telok kari Naga yimten tebilemtsü ya tatembang ka küma melatettet tashi election magitsüla ta nokdak aser yimten telok katibo Naga yimten tebilemtsü ya tatem küma latettsü asoshi election agitsüla ta nokdak. Item ola ajakji Naga yimten tebilemtsü latetnüba ola liasü. Ajisüaka, tang election agir ita tuku tsüngda election mapang nung Naga yimten tebilemtsü latettsü asoshi süoki ia jembirtem shingaia jembiba amato mapa agi inyaka mangur. Atangji, nübortem asoshi terenlok mapa inyaktsütsü atema yimsüsürtem ajak Kohima o Delhi na tsüngda senotsü bushilen kanga mazüngi jajaba angashir aser angur. Ibajia tim. Ajisüaka, Naga nunger asoshi terenlok mapatem dang nungibo Naga yimten tebilemtsü latettsüba ya tongtibangba lir, kechiyong iba tebilemtsü ya melatettet tashi Delhi nungi bener aruba sen agi Nagaland nung terenlok mapa takok ngua meinyaktettsü. Iba tangatetba nung akok tashi India government den Naga nunger nüchiso bushirtem maneni ajurutepdakja tagitsü ken o süoka jembidaktsütsüla. Atangji, asenokia memeteti parnok o parnok nabo ajurua nüngdak ken o süoka jembia alitsüa akok, ajisüaka nisung ajaki meteta ken o mebenok tashi ken o mamentsü. Joko, NSCN-IM telokbo India den yimjung lapoka ken o jembi tenzüker küm 20 jungogo aser Naga nunger linük tenzüker tanga teloktem longjemer akümba Working Committee of Naga National Political Groups purtema India government den yimjung lapoka yimten ken o jembi tenzüker küma ka jungogo. Ajisüaka, telok katia tang tashi Naga nungertemi yongyaba ama ‘ Political Solution’ bener maruteti lir. Iba amai Naga nungertem rongnung telok aika küma lemsar, India nunger yimsüsürtem den Naga yimten ken benoka jembiba mapang ano Naga nungerbo telokang talila ka kümogo. Ano, tekaratiba nung takoktsü lenmang bushitepa teti asoshi telemtetba kati marutetra, Naga nunger linük tenzükertem rongnungang ano telok talila küma aotsüa akok. Iba denji asenok ajak asoshi shisabolutsükaji lenirtem teimbaka tambur akümer, anungji arishi agi talangkabo matatettsü. Item ajakji züngdanga asenoki tekaratiba nung yimten tebilemtsü ya tatembang ka küma melatettetra, ashiko tamburtem oadokerbo tanuburtemibo tangar den Naga yimten ken o jeta mejembitettsü. Ibaji dang masü saka tanübo Naga nunger lenirtem ajak amato yimten nüchiso masü rongsen bushibalenang talangba benzür amato kümogo. Naga nunger asoshi tang mapangba ya rongsen tama masü saka Tsüngrem aser yimten telemtetba tama bushitsüba mapang lir. Iba tangatetba nung Naga nunger yimten lenirtemi election mapang nung jembiba mamai mapa küma inyaktsüla. Joko, Naga yimten latettsü asoshi jembitsü atema election matatsüla, saka ano election mapang marudangsa, Naga yimten tebilemtsü ya latetter alitsüsa, Naga nunger tenüng nung India den yimten ken o jembirtemi aser Nagaland nung India temzüng kübok tentetba political party shia nung lenirtemi ochi mulung agi Naga nunger tarutsü lanurtem asoshi bendanga agüja inyaktsüla. Tanü asenok asoshi alima rongsen jenti madak kibur akümba dangbo mesüra temaba yimten yimsüsüba menden ka nung amentsü maongka anguba dang nungibo tang aser teti asoshi Naga yimten tebilemtsü ya mali küma latetbasa noklangben agia tajungba aser tajangzük tuluba asütsü.