Naga yimten latettsü asoshi ita ana agitsü, Tatar senden nung benoka jembimatsü

Dimapur, Aug. 06 (TYO): Ajungbena ka dang Aor Tsüngremmong mapang August 3, 2015 nü India sorkar o NSCN-IM telok na tsüngda Naga yimten tebilemtsü ken o tembanga jembitsü asoshi yimjung ken o tangatettep kar renemogo ta metetdaktsüba sülen ano tejangja osang kecha memetetdaktsüi lir.
India sorkar aser NSCN-IM lenirtem nungi angazükba agi, August 3 anogo nung renemba ken o ji shitakba Naga yimten ken o jembia aotsü atema tamendakdak onük kar mulungtepa renemba mapa ka liasü. Anungji, iba August 3 terenemba onüktem nungji ajemdaker Naga yimtenji kechi komaka lateta aotsü, ibaji tang nungi bentetbenteta jembiyonga aotsü.
India sorkar tenüng nung Naga yimten tebilemtsü latettsüba onük nung NSCN teloktem den jembir, Wb.R.N.Ravi-i Hindu osangkaket nungi osangbener den jembidang ashiba agi, kodang Naga yimten latettsü asoshi ken o ajak renema arudir, itemji mapa küma inyaktsüsa lemtettsü atema tatar hoho (parliament) nung benoka jembitsü.
Angazükba agi, India sorkari item ken o renema jembitsü asoshi tang nungi ita ana agitsü aser November ita tashi nungbo tejangja telemtetba kati arutsü.
Iba ama yimten tebilemtsü tatem küma latettsü asoshi inyaka aotsüba inyakyim tenzükdang R.N.Ravi-i India sorkar o NSCN-IM na tsüngda lemtetba onüktemji tezüluba nung (draft) Home ministry nem agütsütsü aser parnoki iba tezülubaji nüngdakba tanga ministries aser state sorkar nem tebilemba ken o shidangtsü asoshi agütsütsü. Iba sülenang ajaki mulunga agizükra cabinet nung benoka jembitsü aser cabinet-i kodang agizükteta telemtetba agidir, tatemsa ibaji tatar hoho (parliament) nung benoka jembitsü.
Tang tashibo item meraji kata magi anünga lir, anungji taruba ita ana tsüngda item maparen ajakji tadongtsü purtem ajak tonga jembia inyaktsü terenemba lir ta angazüker.
Kasa ken o nung, Congress lenir tain kati ashiba agi, tang amaji kasa tebilemba nung Naga yimten ken o ya 2011 küm latettsü asoshi terenemba liasü saka Manipur chief minister-i kanga sashia anema apusoba ajanga mapa küma mejembitet.
R.N.Ravi jakdang Naga yimten tebilemtsü ken o jembitsü asoshi India sorkari shimtetsang aser taoba Chief Secretary, Wb.R.S.Pandey-i ashiba agi, tamalena Naga yimten tebilemtsü ya tatem küma latettsü asoshi lenmang karbo nguteta liasü saka kidanger state-temi kanga sashia anemba ajanga meinyaktet.
Naga yimten tebilemtsü ya tatem küma latettsü asoshi NSCN-IM telok den dang masü saka tanga NSCN teloktema dendaktsü nung tajungba süla. Tang tashibo kechi onük ama ka nung tangatettep ken o yangluar meshitet, saka Naga yimten ken o tatembang kati arua latettsü asoshi jenjang tajung ka agiogo ta bilemer. Iba sorkar yagi telemtetba agitettsü ta paisa ashi.