Naga yimten latettsü asoshi lenmang teyuba kaket ka saya

Dimapur, Dec. 20 (TYO) : India den Naga yimten tebilemtsü latettsü asoshi lenmang teyuba kaket ka tenüng agi, “A Way Forward-The idea of a peace accord between India and the Nagas” December 18 nü to tesem balala nung nüngtugu nisung asemi külemi sayatsüogo.
Iba kaket ya Nagaland nung osangbener aser Morung Express osangkaket nung mezüng yimozülur, Wb.Along Longkumeri züluba lir. Iba kaket sayaba sentong ya kecha balaka tesem ka nung merenem saka Naga nunger nüngtugu nisungtem Rev Dr Tuisem Shishak, Niketu Iralu aser Rev Dr Wati Aier par asemi pei pei alidak sarasadema sayatsü. Kaket zülur. Wb.Along Longkumer ya tang Delhi nung lir aser pai züluba kaketji kaket menünga adoktsür Heritage Publishing House kibur Dr.Lanusangla Tzüdiri par asemprongla ket tongtsü.
Naga nungertem rongnung ajak asoshi tatishitsü tajung aketba lenirtemji par asem ya lir, anungji par asemi iba kaket sayatsütsü tetemsü ta ni bilemer ta kaket züluri metetdaktsü.
Iba kaket nung Naga yimten tebilemtsü dak aketba tongtibang onük ana “sovereignty” aser “integration” tebilemtsü akoktsü asoshi lenmang kar teyua lir.
Nagaland ya India den tesendaktep lia ‘quasi-sovereign’ jenjang nung alitsü akok, iba mesük tesendaktepji United States o Puerto Rico na ta lir ta kaket zülurisa shidanga lir.
Naga nunger alushi balala nung aliba longjemtsü asoshi Naga nunger alidak tesem ajak shilem agidak tesem ka mesemteta yangji yimjung, terenlok aser külemi rongsenren tsütsü inyaktsü inyakyim ka latettsüla ta Along Longkumerisa pa kaket nung shia lir.
Naga nunger longjemtsü asoshi tebilemba ka lemsatepdang, Naga nunger nüchiso bushir telok balala ajak ya NNC tenüng nung longjemtsüla aser sorkarbo Government of the People’s Republic of Nagaland or GPRN asütsüla ta paisa shia lir.
Paisa Naga nunger ajak telongjem tentet ka nung litettsüsa tang tenteta aliba Forum for Naga Reconciliation (FNR) ya yanglushir Pan-Naga ta jembiba tentetyim nung tentetshia inyak nung ajungtsü ta bilemer.
Iba kaket ya Signet Book Shop, Notun Bosti Junction, Dimapur aser Starmart, Jail Colony Kohima nung angutsü.