Naga yimten latettsü atema asenok kikümbang nung noktaka lir

I-Day sentong nung Chief Minister Neiphiu Rio-i Kohima nung marching contingents sema aodang agiba noksa angur. 

Kohima, Luroi (August) 15 (TYO): Linük den külemi Nagaland nunga sobaliba takar sayua tanü 72 buba Independence Day amung.
Iba anogomung nung Chief Minister Neiphiu Rio-i Naga yimten latettsü atema asenok kikümbang nung noktaka lir, ta metetdaktsü. “Naga nunger ajak atema jenjang, adenba aser agizüktetba telemtetba ka tekaratiba nung agitsü” ta pai ashi.
Tanü Secretariat Plaza nung sentong agidang Chief Minister Rio-i linük wako salatsü aser marching contingents 24 nungi salute agi.
“Tesüiba küm 21 tashi yimten olemtep agiyonga arur. Asenoki tayongzükba aika ajuruogo saka nübortem aginüba mulungsentsü jakdang mokoktettsü khuret kecha mali. Asenok ajak longjemer alizüng atongtsü atema merangtsüla” ta Rio-i ayongzük.
PDA sorkar atema tonti teinyaktsü rongnung Naga yimten latettsüba lir. India sorkar aser Naga yimten teloktem tsüngda yimten olemtep nung onoki teyariteper tajung ka ama shilem agitsü nangzüka inyaker, ta paisa ashi.
Naga yimten tekaraba nung latettsü atema sorkari mapa aika inyakba nung Political Affairs Committee ka tentetba dena lir. Onoki tribal hoho tem aser civil society organization tem den sendentem ayonga amener aser mapang shia India sorkar tenüng nung shimtetba nübotem den ajuruteper, ta chief minister-isa shisem.
“Taküm Monupii (May) 11 nü Kohima nung onoki tribal hoho tem den ajurutepdang, NSCN-K dena Naga yimten telok ajak dang India sorkar den ceasefire yanglushitsü aser ajak adenba telemtetba ka agitsü atema telok ajak adentsü atema ajungmesotsü bangzünga renem” ta Rio-i ashi.
Nagaland Legislative Assembly nung Speaker dang taoba Joint Legislators Forum tentetshitsü atema mepishi, ta paisa shisem.
Naga nungertemi Naga nunger aliba litsü ajak ka kümdaktsüba sorkaria pusema nungiter. Iba asoshi State Assembly pezüben tashi bangzüngtem renemogo aser kidanger state tem danga Naga nunger putiotsü aser temetentem agizüktsü aser akhümtsübutsü mepishir. Asenok kidanger tajung ama liyonga aotsü atema Naga nunger putiotsü agizüktsü mepir, ta Neiphiu Rio-isa metetdaktsü.
Paisa yimten olemtep nung adenba telok ajak aser talisa India sorkar dang nübortemi ola adokba angashitsü aser tekaratiba nung Naga yimten latettsü atema ayongzük.
Tzünglu aser anentsüh ajanga tesem aika nung teraksa aser takoksa bentsür aruba tensa ka nung Nagaland-i iba benjung amunger, ta chief minister-i ashi aser paisa nisung 10 asüba atema state-i mang ayimer ta shisem.
Iba dak sendakba nung Rio-i sorkar departments, Civil Administration, Police, NSDMA, civil societies aser nübortem dang essential commodities bener otettsü atema lenmang anenbanga alibatem ajak lapoktettsüsa yaritepba atema pelaba metetdaktsü.
“Nagaland nug alirtemi ola adokba angashia India sorkari Indian Air Force helicopters ana tashi agüja yaritepba atema kanga pelar” ta paisa shisem.
Taküm Mesüremi (March) nung nübortemi par sorkari ‘Temelenshi aser Terenlok’ bener arutsü atema tashi agütsü ta Rio-isa ashi. “Sorkari tashishitsü melii aser ochishia inyaktsü atema onoki mapa tenzükogo” ta pai shisem.
Nagaland nung infrastructure nüngdakbatem atema paisa ashiba agi “Teinyaktsü aika lir ta sorkari ajitetogo. Gari lenmangtem yanglutsüla aser anepalutsüla aser lanurtem atema mapa adokdaktsütsüla.”
Nagaland melenshidaktsütsü atema asenok ajak külemi teka amteper inyakdi, ta paisa mepishia ashi.
Tanü Secretariat Plaza nung agiba sentong nung Nagaland Legislative Assembly Speaker, Vikho-o Yhoshü-i anir MLA tem, Chief Secretary Temjen Toy aser DGP T J Longkumer nati anir tongti ketdangsertem aden.
Sentong nung Chief Minister Rio-i IGP (NAP) Bendang Lemtur nem President’s Police Medal for distinguished service aser IGP (Crime) S R Saravanan nem President’s Police Medal meritorious services agütsü. Paisa nisung 13 nem aser Sendenyu Community Biodiversity and Wildlife Conservation Committee, Sendenyu Village, Tseminyu sub-division, Kohima district nem Governor’s Gold Medal agütsü.
Tanü Dimapur nunga Deputy Chief Minister, Y Patton-i linük wako salatsü aser parade contingents 18 nungi salute agi.