Naga yimten latettsü atema menden toktsütsü mulunga lir: Imchen L Imchen

Kohima, Aenjeti (January) 10 (TYO): Nagaland nung assembly election agira Chief Minister T R Zeliang-i aniba sorkar tanaben kümtettsü saka Naga yimten latettsü atema onoki bendanga agütsütsü mulunga lir ta Health & Family Welfare Minister, Imkong L Imchen-i ashi.
Yaküm nungi Imkong-i 2018 telemtetba ka magi tashi state general election magii atatsü atema jembia arur aser tanü pai osangbener den sensaksemdang ashiba agi, “TR Zeliang-i aniba sorkar maneni arutsü saka Naga yimten tebilemtsü atema onoki iba maongkaji magitsü renema lir.”
Election Commission of India ya shinga pei sasa ketdangsüba telok ka lir ta Naga Peace Talks atema Interlocutor, R N Ravi-i ashiba olen atema Minister Imkong-isa ashiba agi, “Election Commission ta India Linük Temzüng kübok tentetba telok ka lir, anungji parnok India sorkar küboki aiter.”
Peoples Representation Act nung ashiba agi Election Commission-i India sorkar dang asüngdangya asüba sülen ang election agitsüla. India sorkari election agitsüsa tensa ka masü ta shira, parnoki iba tetuyuba sülen anidaktsüla, ta paisa metetdaktsü.
Anungji, Election Commission ji pei sasa ketdangsüba telok ka ta Interlocutor-i ashibaji shitak masü, ta Imkong-isa shisem.
Tongtipang onük teimbaka angatettepogo ta Ravi-i ashiba atema Imkong-i “onoki India sorkar nem anogo züngzüka magütsür saka India sorkari tamasa yimten ken o atema telemtetba agiang aser iba sülen ang elections agiang ta onoki ashir” ta metetdaktsü.
“Naga nungertemi election ka thinenang ta ashibaji India sorkari atema mapa tasak masü. Election magitsüla ta ashibaji, sendaktepba aliba telok ajak dang Naga yimten tebilemtsü tamasa bentetang ta ashirba dang lir. Tanü tashi kija mesüra telok kati danga iba tangatetba anema menokdaker” ta paisa ashi.
Prime Minister Narendra Modi-i Naga yimten latettsü atema kanga meranger anungji Naga nungeri iba maongka süia moudaktsütsüla, ta paisa ayongzük.