Naga yimten latettsü atema tongtipang onüktem angatettepogo: Rio ; India aser Myanmar nung Naga nunger yimten balala latettsüla

Kohima, Rongchii (April) 13 (TYO): Indo-Naga yimten olemtep nung adenertem tsüngda tongtipang onüktembo angatettepogo saka tamaitsü dak sendakba onüktem ano mangatettep lir aser iba jagi Naga yimten latettsü atema tetsükdaktsü ajurur, ta Nagaland Chief Minister, Neiphiu Rio-i ashi.
NSCN (IM)-i 1997 küm India sorkar den ceasefire alitsü lemtet aser iba sülen yimjung olemtep agiyonga arur Luroi (August) 3, 2015 nü Prime Minister tsüngdang Framework Agreement agi. Yaküm NSCN(K) dak alaka Naga nationalist political groups (NNPGs) troki India sorkar den yimjung olemtep alitsü tenzük aser teloktem rongnung Adino Phizo-i aniba NNC dena lir.
“Taküm Nagaland state general election magidangsa teloktem tsüngda ken o tem angatetteptsü merang saka ibaji mekoktet” ta tanü State Civil Secretariat nung Rio-i osangbener dang ashi.
“Tanga NNPGs-ia olemteptsü tenzükogo aser parnoki Naga yimten latetnüra, takoktsü aser makoktsü bendangtettsüla” ta paisa ashi.
“Ni wako aser passport tem indang balaka mejembir saka kodang tamaitsü dak sendakba tebilemtsütem ta südir, itemjia aittsü aser parnok tsüngda item onük atema jembidar” ta Rio-isa metetdaktsü.
Naga nunger ka akümtsü atema temeten lir ta Centre-i shiogo saka tangbo ibaji mapa küma inyaktsübaji tamakoktsü. Iba mapaji democratic maparen ajanga inyaktsüla aser iba nung teloktem tsüngda angatettepra ajak atema tajung asütsü, ta paisa ashi.
NSCN(K) medeni Naga yimten latetbaji ajaki agizüktsü asü koda ta osangbeneri asüngdangdang, “Ni ibaji atema jembitsü temeten mali saka NSCN(K) telok nung parnok teimbaka Myanmar nung aliba Naga nungertem ta asenok ajaki meteta lir” ta Rio-i langzü.
“India aser Myanmar na ya linük balala lir. India nung state pezü nung lemsaa aliba Naga nungertem ka akümtsüla aser Myanmar Naga nungertemi yimten balaka latettsüla ta nibo bilemer. Kechiyong Myanmar parliament nung Naga nunger teshimtet nübotem lir aser pei sasa ketdangsütsü tashi agüja lir” ta Nagaland chief minister-isa metetdaktsü.
“Linük kati tanga linük ka atema telemtetba magitettsü” ta Rio-isa shisem.