Naga Yimten latettsü mapang tonga aruogo: R N Ravi

Dimapur, October 18 (TYO): Prime Minister, Narendra Modi lenisüba kübok India sorkari küm 22 tema jembia aruba Naga Peace Process akhümketa tembangtsü atema meranger. Iba tangatetba nung ajemdaker taoba küm pungu tashi inyaka arudang, joko olemtep tembangtsüsa mapang ka ajuruogo, ta GoI Interlocutor for Naga Peace Talks, R N Ravi-i sangdong ka nung metetdaktsü.
Naga telungpur telok ajaki Interlocutor den jembia arudar aser draft final settlement ka yanglua lir. Nagaland, Manipur, Arunachal Pradesh aser Assam nungi kin aser civil society teloktemi Yimjung Maparen nung shilem agir aser shisatsü aika agütsüogo. Arogo lennirtemia sarasadem aser tebilemba tajung ajanga nungitba agi yimjung nung arur, ta R N Ravi-isa ashi.
August 3, 2015 nü NSCN (IM) den aser November 17, 2017 nü Naga National Political Groups (NNPGs) indang Working Committee (WC) den tenangzükbatem agia liasü. Tang ajaki mulunga ‘draft comprehensive settlement’ ka renemogo aser iba ajanga joko tatembang telemtetba nung sign asütsü dang anünga lir, ta paisa metetdaktsü.
Ajisüaka, iba ama mapang ka nung NSCN (I-M)-i Naga linük wako aser temzüng atema ola adoka, mapang atsülangtsü meranger. Iba onük atema India sorkari tangatetba parnoki kanga junga meteta lir sernung tekong meranga noktaker aser parnoki Framework Agreement bener arua, iba nung maliba onük kar jembir aser iba atema sasa bilemer, ta Ravi-isa sangdong nung shia lir.
NSCN (I-M) lennir karibo media nung India sorkar den parnoki mulungtepogo ta asüba onük tiyazü kar lemsatepa nübortem anisar. Iba jagi tanü (October 18, 2019) Hotel Japfu, Kohima-Nagaland nung Naga loktiliba nung lennirtem den senden ka amen, ta paisa ashi.
Senden nung Nagaland nungi Naga kin 14, Nagaland nung minority non-Naga tribes, Nagaland GB Federation, Nagaland Tribes Council, Arogo lennirtem aser Civil Society Organizations nungi teshimtet nübotem aden. Senden nung (NSCN I-M) den Framework Agreement aser Working Committee of NNPGs den Agreed Position agiba nung dena aliba onüktem metetdaktsüogo, ta R N Ravi-isa ashi.
Naga lennirtemi kanga dang shisa kaa tebilembatem lemsatepba aser memenui Naga yimten latetdaktsünüa metetdaktsüba atema kanga pelar. India sorkari Naga nungeri aginüba akhümtsübua, tekaratiba nung Yimjung Maparen tembangtsü, ta paisa metetdaktsü.
Prangpong kübok tanen makai olemtepba ya magizüker. Olemtep nung dena aliba telok ajaki nübortemi aginüba ama inyaktsü imlar aser mapang lateta aliba tsüngda Naga Peace Process tembangtsü atema yariteptsü imlar, ta Ravi-isa ashi.