Naga yimten lemtettsü mapang atsülanger

New Delhi, October 31 (Agencies): Centre sorkari October 31 tashi nung Naga yimjung olemtep tembangtsü ta mapang lateta aliba atsülangogo ta osang angazüker.
Iba ya NSCN-IM lennirtemi takok anguba ka mesüra Centre-i linük nung law & order tensa azüoka ayutsü atema inyakba mapa ka asütsü akok, kechiyong October 31 nü Union territory (UT) ana- Jammu & Kashmir aser Ladakh kümtetsü lir.
Hombarnü NSCN-IM aser Centre tsüngda senden amendang Centre-i Naga telok ajak den olemtep tembangtsü atema October 31, 2019 mapang lateta aliba atsülangtsü lemtetogo, ta senden nung adenertemi ashi.
Union home ministry nung inyaker kari EastMojo dang ashiba agi, “tesüiba anogo 28 tsüngda senden balala menyonga arudang obang meputep aliba onüktem mangatettepi dang aru, saka tanü senden timi tenzük.”
“Centre-i October 31, 2019 nü Naga yimjung olemtep tembangtsü ta joko mashitsü amai bilemer. Naga telungpur teloktem den tesüiba küm 22 tashi olemtepa arur. India nüjiso anguba sülen olemtep talangtibaji iba ya asütsü” ta Union home ministry osang ajangasa ashi.
Taoba mapang NSCN-IM aser Centre tsüngda sendentem mena arudang wako aser temzüng balaka takhangba onüktem atema tangatettep kati marui dang tembanga liasü.
Taoba mapang Centre-i October 31 tashi nung Naga yimten teloktem den olemtep tembangtsü ta anogo lateta liasü.
Centre-i wako aser temzüng balaka alitsü meshibaji magizüktsü ta jangjajangja shiogo.