Naga yimten nüchiso mechi Ao kin tim tatemba atem : Rev.Dr.Wati Aier

Rev.Dr. Wati Aier-i “Ao Lima Nüktzü” kaket sayatsür külen kaket zülur Tiala Imchen den külemi tangokba noksa ka yangi angur. Dimapur, July 25, 2015.

Dimapur, July 24 (TYO) : Naga nunger yimten nüchiso bushiba otsü nung Naga kin ajaki timtem reshikangshi jenti ajuruogo, saka item ajak rongnung India sepaitem ket nung Ao kini ajuruba reshikangshi mapang amabo tanga Naga kin shingaia majuru ta OTS nung principal aser FNR nung Convenor, Rev.Dr.Wati Aieri metetdaktsü.
Pai iba o ya tanü Hokolbar nikongdang IMC, Dimapur nung Tiala Imcheni züluba kaket ka tenüng agi ‘Ao Lima Nüktzü’ sayatsüba mapang metetdaktsü.
Naga yimten nüchiso atema nokdak dang, Naga kin ajak tesama aser takoksa aser timtem reshikangshi ajuruogo, saka tangar Naga kintem otsü nung, Ao kin dak alaka, India sepaitemi ‘Grouping’ süa yur reshikangshiba otsü mali ta Rev.Dr.Watiisa metetdaktsü.” Asenok kanga kangshiogo, anungji asenok mulung kanga kurema lir, ajisüaka itemji salaa chioktsüla aser taoba mapang atalokbatem den asenok tangatetba tajung kati aruadoktsüla,” ta paisa metetdaktsü.
Taoba mapangtem atalokba otsütemji asenoki mamatsüla saka taoba mapang asenok dak tamajung atalokba ajakji asenok mulung nung rema meyui odaktsütsüla, iba jagi asenok mulung kurema aliba züboji aneptsü ta Rev Dr.Watiisa metetdaktsü.
“Iba ama taoba tatalokbatem indang mamai tarutsü indang bilema tanü tangatetba kati arutetra, iba jagi Naga yimten telatetba kati arutsüba nung tuluka yaritsü aser iba ama sentongji ka Ao lima nung asenoki tenzüktsüla,” ta paisa ashi.
Rev.Dr.Wati Aierisa kaket zülur, Tiala Imcheni teburtemia meinyaktetba mapa ka timtem aika agia Ao lima yimtsüngtem sema orr asenok Naga yimten asoshi timtemba otsü kaket küma adoktetba asoshi tenüngsang agütsü.
Iba sentong nungsa “Ao Lima Nüktzü” kaket indang kaket zülur. Tiala Imcheni ashidang, ” iba kaket nung Assam police aser Indian army guideji VG-tem ser asen Aortem tesüngmangtsü reshikangshiba otsü indang züludang aiben kü tenük nungi nüktzü jenzüka alua kü manuscript metensaa aoba agi iba kaket tenüng ” Ao Lima Nüktzü” ta jatsüogo,” ta metetdaktsü.
” Iba putu mapang teburtem langdem dak alaka temang mangsa nung, shilong zükteta azükdangji, pei tetsü tasolai, kinüngtsüi aser jala jabasoi mereprangteti asüktema ajepba otsü kü dang ashidang, ni kong mena lir memeteti luladok,” ta laisa Ao yim 40 tashi sema oa otsü bushidang atalokba indang ashidang metetdaktsü.
Iba kaket nung Ao lima ‘Grouping’ mapang India sepaitemi yim 40 rongdokja reshikangshiba otsü tejangja zülua lir. Iba kaket nung tatalokba otsü ka ashidang, ” teburtembo shinga alui meyoki yimmaker lar dang kümer ayu… tetsürtem dang alui aotsü mela… alui aodanga teka nung seal ajenloktsür külenjia “Jai Hind” ta shidaktsürang yok,” ta shia lir. Kasa kaket nungsa, ” iba grouping mapang nungji yim pongo sangertemji tachi tajemtsü maka arem she tua aser süngolio bushia chia ayatzüra agi tesüngmangtsüka okrongseta liasü,” ta shia angutsü.
Ano temulung ashitsüka yim ka nung atalokba otsü ka ashidang, ” lai tsükchir (army) dang imlibilema ojang dang süang, nenoki peria inyakogo, ojang süang ta mepishia ajepyonga mangai parnok tzüramatem tashi maneni inyak,” ta shia angutsü, Itemji asenok yimten aser tsüraburtem aser asen lima otsü lir.
Iba kaket sayaba sentong nung pusem o Tir Yimyim yimozülur, Wb.K.Temjen Jamir, Ao Senso Telongjem Dimapur tenüng nung Wb.C,Onen Walling, akhidang Ao lima nung Naga yimten asoshi inyaktsü Volunteer tenzükertem rongnung Chungliyimsen nunger Wb.Tinu Pongen aser Mangmetong yimten tenüng nung Council mendenbuba Wb.Talimeren Tzüdir nungertemi jembia liasü.
Iba sentong ya Dr.Sünep Imcheni ani aser Dimapur Ao Baptist Arogo nung Associate pastor Wb.T.Ariba Imcheni sarasadema tenzük aser tebu tedi Wb.T.Nokpang Jamiri sarasadema sentong atem.
” Ao Lima Nüktzü” kaket ya item tesemtem nung sen jenjang Rs.500/- agi angutsü :
DIMAPUR :
1. Duncan Tinali junction nung, Rainbow Coaching Center building downstair dokan nung angutsü (just main road), M- 03862-228519 / 9862606442
2. Oasis Hostel, H/No- 74, Landmark colony (PWD)
M-9856072258
3. Diphupar nung MR. LANU IMCHEN kidang angutsü par ki Rongmei ground nung lir.
M-9856518176
4. Diphubar -B nung MR. NOKPANG JAMIR kidang angutsü. Opposite to Chang Church, Sovima ground.
M-9436074065
MOKOKCHUNG:
1. Mokokchung Town Baptist Arogo nung Mr. MOATOSHI JAMIR Counsellor, ket nungi angutsü, M-9436605825
2. I.B.MEREN IMCHEN . H.No. 24 (Osanglong kiyong, below D.I.e) Alempang ward.
M-9856240220/9856787093
3. MR. PURCHIBA, Marepkong, Sewak Gate.
M-8575401805/9436071282
KOHIMA:
1. WT. TIARENLA, Kohima Mangmetongtsur Telongjem Kimen. P.R. Hill Colony (Near Supply Office)
M-9856330111
2. WT. IMLINUNGLA, President, Khm MTG Tsür Telongjem. A.G. Colony (Near taxi station) M-8794404993
N.B: Ao Lima yimtsüng teimba ka nung yimten ket nungi angutsü.