Naga yimten tebilemtsü agi kaketshisatsü menur angazük: Kenye

October 27, 2016 nü Porba yimtak Jubilee nüngshilong sayatsüba sülen MP, KG Kenye, DC Phek Muruho Chotso aser VMGHS Head Master aser Staff tem külemi tangokba noksa nung angur. 

Porba (Phek), Oct 27 (TYO): Naga yimten tebilemtsü aliba ajanga Naga nungertemi menurang kaketshitsatsü angazük tenzük, iba jagi tang tashi asenoki tangar menepa kaketshisatsü shitak angazüka moutetter, ta tanü Nagaland nungi yoksang Rajya Sabha nung tatar, K G Kenye-i metetdaktsü.
Tanü Phek district kübok Chizami sub-division nung Veyieta Memorial Government High School (VMGHS), Porba lapoker küm 25 ajungba Silver Jubilee sentong nung tongti tesemdanger o jembidang, pai iba o ya metetdaktsü.
Tanü putu nung technology tapu balala adoka taküm libaliro melenshidaktsütsü merangba den ano külen pei sobaliba metoktsüi wazüka ayutsü merangdang, kaketshirtemi kechi shitak aser kechi tajung, item jenjang tajungtemji ajangzüktettsüsa meranga inyaktsüla, ta paisa ayongzük.
Akhi tetsüteboutem dak aketba ochi aser meranga inyakba sobalibatem mesamadaktsüi itemji tanü lanurtemi senmang küma amshitsüla ta paisa metetdaktsü.
Paisa iba school lapoker samanirtem nem tenüng agütsü.
Iba kasa sentong nung Phek Deputy Commissioner, Muruho Chotso-ia kaketshisatsü bushibaren nung mapa inyak dena angazüktsüsa sentong yanglutsü nüngdakba indang metetdaktsü.