Naga yimten tebilemtsü akoktsü asoshi lokti tentettemi sorkar nungiter

Kohima, July 31 (TYO) : Mapang talangka Naga yimten melatetteti aruba tebilemtsü ya koktettsüsa inyaktsü atema Nagaland nung tenteta aliba tongtibang lokti tentettem ajaki Nagaland sorkar telemtetba nung pusema nungittsü telemtetba agiogo.
Iba telemtetba ya tanü Kohima nung Nagaland sorkari ayongba senden ka nung Naga nunger lokti tentettem aser Nagaland nung aliba Naga kin shia telongjem nungi teshimtetpurtem adenshia lemteta liasü.
Tawa Nagaland tatar senden amenba mapang tatartem ajaki mulunga Naga yimten tebilemtsü akoktsü asoshi inyaktsü atema pangzüng pongo renem aser item pangzüng pongopronglaji shitak renemogo, ta tanü Hokolbar nü state sorkari ayongba senden nung adener lokti aser Naga kin lenirtem ajaki mulunga agizükogo.
Iba osang ya tanü lokti telongjem senden temer külen Nagaland Legislative Speaker, Wb.Chotisuh Sazo dena lia CM TR Zeliangi osangbenertem den jembidang metetdaktsü.
Tawa Nagaland tatar senden aliba mapang July 27 nü Naga yimten tebilemtsü akoktsü asoshi latetba pangzüng pongo rongnung mezüngbubaji “Nagaland Legislative Assembly ajanga December 12, 1964, August 28, 1970, September 16, 1994 aser December 18, 2003 anogotem nung amendang India sorkar dang Naga kintem shirnoksa alushi agi sendaktepa ali, item Naga kintem ajak yimten ka kübok ayutsü lemtetba ama India sorkari ibaji ataloktsütsüla,” ta renema lir.
Tanabuba nung, Naga yimten ken o junga jembia otettsü atema kasa senden nungsa India sorkar o NSCN(K) na tsüngda tanaben yimjung lapoktsüla ta lemteta liasü.
Kasa senden nungsa India sorkari Nagaland State ajunga ya Armed Forces Special Powers Act 1958 ajanga ‘Disturbed Area” kümtsür aliba telemtetba ya agientsüla ta takhangba agütsü.
Ano kasa tatar senden nungsa Naga lima nung teti atema yimjung alitsü asoshi Naga yimten tebilemtsü ya tatem küma latettsü atema Naga nunger linük tenzükertem o Naga nunger lokti tentettem na külemi longjemer inyaktsüla ta temepishiba ka metetdaktsü.
India sorkar danga Naga yimten ken o ya tekaratiba nung latettsü asoshi tekaratiba nung tebilemba lemsatepdaktsüner ta metetdaktsü.
Nagaland tatar senden nung lemtetba pangzüngtem ajak lokti tentettem aser Naga nunger kin ajaki junger ta agizükba tetezüji nisung ajaki yimjung nung alima renlokner, item pangzüngtem anema kin shingaia ola madok ta Chief minister T.R.Zeliangisa metetdaktsü.
“Ibai Nagaland aser bendanglen alir Naga nunger ajak asoshi osangtajung ka lir,” ta paisa ashi.
“India sorkari Naga yimten tebilemtsü koktettsü asoshi tebilemba kar benoktsü renema lir saka Naga nungeri memulungtsü südi ta bilemba agi item tebilemba ken o ji metsükdaktsür, ajisüaka asenoki temetettertem den ken o lemsatepra, item ama tarendaktsüji kecha malitsü, ” ta paisa ashi.
India tenüng nung Naga yimten latettsü asoshi jembir, Interlocutor Wb.R.N.Ravi ano tanaben Nagaland-i arutsü renema lir, pa kodang arudir pai Naga nunger lokti tentettem Naga Hoho, ENPO, NMA, ENSF aser NSF lenirtem ajurua jembitsü. Item teloktem den jembibaji Naga nunger ajak den jembir amai asütsü, ta T.R.Zeliang-isa metetdaktsü.
Tamalen tatar senden nung Naga yimten tebilemtsü akoktsü asoshi latetba pangzüngtem mapa küma inyaka aotsü asoshi kecha meinyak, saka tang mezüngbuba tatar senden nung Naga yimten ken o latettsü asoshi pangzüng renemba sülen, ibaji mapa küma aotsü atemabo tangang jenjang ka agir ta Chief minister, T.R.Zeliang-i metetdaktsü.
Paisa ashiba agi, Naga nunger asoshi telongjem aser takoktsü bushiba na külemi aotsüla, kechiyong iba jagi dang yimten nung dang masü saka rongsen tsütsüa asenok nüjiso angutsü.
Zeliang-isa, “India sorkari Naga nunger tebilemtsüji angateta dang lir aser telatetba kati arutsü mulunga dang lir,” ta ashi.
“Tang amai kasa tangatetba lenmang nung ao nungbo yakta telatetba ka dangi arutettsü. Onoki telongjem asoshi inyaktsü aser idangji ano yimten telatetba ka asoshia maneni inyaktsü,” ta Chief minister-isa ashi.
Tanü amenba senden nung Nagaland Legislative Assembly nung tatar 60 den Forum for Naga Reconciliation, Naga Hoho, Eastern Naga Peoples’ Organisation, Naga Mothers’ Association, Naga Students’ Federation aser tribal hoho-tem nungi – Angami Public Organisation, Ao Senden, Chakhesang Public Organisation, Chang Khelei Setshang, Khiamniungan Hoho, Konyak Union, Kyong Hoho, Phom People’s Council, Pochury Hoho, Rengma Hoho, Sangtam Likkhum Pumji, Sumi Hoho, Yimchunger Tribal Council aser Zeliangrong Baudi nungertem liasü.