Naga yimten tebilemtsü akoktsü asoshi Naga nunger longjemdaktsütsüla

Brehostibar nü NSF office, Kohima nung NSF tenzüker küm 68 ajungba sentong nung Tir Yimyim yimozülur aser taoba NSF Tir, Wb. K Temjen Jamiri jembidang agiba noksa ka yangi angur.

Kohima, Oct. 29 (TYO): Naga nunger yimten tebilemtsü akoktsü asoshi lokti aser Arogo lenirtem aikati kanga meranga inyakogo, ajisüaka tang tashi takok mengutetba ya parnok külemi longjemer masü saka pei pei merangmerangba agi takok menguteti arur, ibai asenok ajak asoshi mapa tasak ka kümogo, anungji ajak külemi longjemer akoktsü merangtsüla, ta taoba NSF Tir & Tir Yimyim Yimozülur, Wb.K.Temjen Jamiri metetdaktsü.
Pai iba o ya yashi NSF tenzüker küm 68 ajungbamong sentong nung tongti o jembidang metetdaktsü. Naga nunger yimjung yanglur aika lir aser yimten tebilemtsü akoktsü asoshi tangatetba tajung agi inyakertema aika lir, saka ajak pei pei dang, anungji item ajakji longjemer yimjung bushia yimten tebilemtsü ya koktettsüsa NSF teloki shilem agia inyaktsüla ta paisa metetdaktsü.
Naga yimten tebilemtsü tatembang küma latettsü asoshi Naga nungertemi jembiba onük ka lemsatepdang, Naga nungertemi Naga yimten telatetbaji akhümketa (honourable) agizüktettsüsa (Acceptable) ka süra agizüktsü ta jembiba nung ya tagitsü shisatsü ka mangur, ibaibo tanur katia jembitettsü, ibai tangar nungi dang tajung angutsü imlaa ataba tamashi o ka asütsü ta K.Temjen Jamirisa metetdaktsü.
“Tang amai tangari bener aru ataa melii, asenokia takoktsü lenmang bushia Naga yimten tebilemtsü latettsü asoshi shilem agitsüla,” ta paisa ashi.
Naga yimten tebilemtsü latettsü asoshi telok kari India o Naga nunger na yimten tashi lemsatsü indang jembir, kari tang aliba Nagaland kübok telatetba tajungba ka bushitsü indang jembir, ano kari ‘alternative arrangement’ indang jembir, item ajakji takoktsü lir, saka itemji takoktsü kümdakja inyaktsü atema Naga nunger lokti shia nungi lenirtem longjemer inyaktsüsa NSF teloki parnok ajakji sensaksem sabang kati anir arua shisalemsateptsüla ta tongti o jembirisa tebilemba ka metetdaktsü.
India den yimten tashi lemsaba (Shared Sovereignty) yabo tang tasen masü, kechiyong tang India temzüng arla 371(A) nung Naga nunger nem parnok ali aser idakji aketba rongsen madak tashi agütsübaji yimten tashi lemsaba maparen ka lir, ta K.Temjenisa metetdaktsü.
Iba senden nung NSF tir Wb.Subenthung Kithan-i telok pelaa agizüka jembi aser Asst. Parist Priest & Administrator Christ King Church Kohima, Fr. Paul Pan, SDB den sarasadema senden tenzük. Iba sentong nung taoba NSF Speaker, R S Jollyson menden liasü aser NSF tongti zülur, Boveio Poukai Duo-i shilem agirtem ajak dang pelaba metetdaktsü.
Iba kasa sentong nung taoba NSF lenirtem rongnung MLA Imkong L. Imchen, State Planning Board nung memdenbuba yariba & MLA Neiba Krunuo, Naga Hoho tir P.Chuba Ozukum aser taoba NSF tir, Pushika Awomi nungertemia jembia liasü.
Tanü iba senden nung adener NSF lenir taintem rongnung Kopelo Krome, Elu Ndang, Kelhouneizo Yhome, Tongpang Ozukum nungertem den tang teinyakdak NSF lenirtem dena liasü.