Naga yimten tebilemtsü akoktsü atema Naga nunger kar shimtsüla

Dimapur, August 29 (TYO): Naga yimten tebilemtsü akoktsü atema India government tenüng nung Naga nungertem den jembisang, Wb. R.N.Ravi Nagaland angh asütsü shimba ya junger, kechiyong iba jagi Naga yimten tebilemtsü onük jembitsüba mapa ya Naga nunger anasai bener arutsüogo, ta Naga yimten latetba nung timtem kecha mataloki latettsü asoshi süoki ia bilemer telok ka tenüng agi , The Naga Rising teloki tanü Brehostibar nü India ato kilonser, Narendra Modi dangi züluba shidi ka nung metetdaktsogo.
Naga yimten latettsüba maparen nung telok ajaki temulung lemteta inyaktsü nüngdaker, anungji tang India government o Naga nunger tsüngda Naga yimten tebilemtsü ya tatembang kati arua latettsü asoshi jembia arua aliba maparen ya tamakok maludaktsüi tekaraba nung ajaki mulungba ka nung latettettsüsa, ano Naga nunger kar shimtsü kanga nüngdaka reprangtetter, ta The Naga Rising teloki metetdaktsü.
India government o Naga nunger linük tenzükertem na tsüngda Naga yimten tebilemtsü akoktsü asoshi shimlokba Naga nungertemji tang shima aliba R.N.Ravi den külemi yariteptsü aser parnoki Naga nunger telok balala den ajurutepa ajaki agizüktettsüsa telemtetba ka bushitsü merangtsü ta parnokisa ato kilonser dang shidanga lir.
Item Naga nungertemji Naga nunger yimten aser loktiliba nung meputepi alibatem putepdaktsütettsüsa temulung lemteta aliba nisungtem asütsüla ta The Naga Rising telokisa ato kilonser dangi züluba shidi nung shia lir. Nüngdakra, item jagi kidanger state nung aliba purtem dena ajurutepa jembitsü ta parnokisa shia lir.
“Naga yimten tebilemtsü latettsü asoshi nü leniba kübok kanga junga jembiteta arudagi aser tang ya Naga yimten tebilemtsü tatem küma latettsü asoshi mapang tajungtiba ka asütsü, anungji nü lenisüba nungsa Naga yimten tebilemtsü ya menua melii latettsü onoki tamang akar,” ta The Naga Rising telokisa ato kilonser, Narendra Modi dang nungi imlaba ka metetdaktsü.
Iba ‘The Naga Rising’ telok nung adenertemji : Along Longkumer,Vitho Zao,Hukavi T. Yeputhomi, Amai Chingkhu, Tsukti Longkumer, Moie Bonny Konyak,Ngukato K. Tsuipu, Mar Longkumer,Joel Naga aser Khriezodilhou Yhome nungertem lir.