Naga yimten tebilemtsü atema Congress-i NPF nung aden : SI Jamir

Kohima, January 29 (TYO) : Naga Political Issue (NPI) indang shisadangba sülen Nagaland nungi Congress MLA 8-i NPF den lokteptsü telemtetba agi ta Hokolbarnü Advisor to Chief Minister for Urban Development Department, S I Jamir-i ashi.
November 20, 2015 nü parnok Naga People’s Front (NPF) nung adenba sülen mezüngbuba Central Executive Council (CEC) Meeting nung jembidang, S I Jamir-i ashiba agi, “yimten mapa nung kechi ataloktsüar meshitet, Congress tenzüka arur aser talisa kü mapang tajungtem nung Tir ka ama inyaka aruba sülen ni NPF nung adentsü asoshi telemtetba agitsübaji kanga zübarabo masü liasü, saka NPI taginübatem jungjunga shisadangba sülen onoki NPF nung adentsü telemtetbaji agi.”
“Onoki yimten tangatetba nung NPF den adentsü lemtet. NPF sasep nung timtem ka adokdang, onok (Congress MLA tem) dang telok ka yaritsü atema asüngdang aser onoki iba teyariji agütsü aser iba nungji ammettsü lemtet” ta SI Jamir-isa metetdaktsü.
Election shia yimten telok ajaki inyaktsü ta nangzükba mezüngbubaji Naga yimten tebilemtsü asoshi lir aser ibaji tanga kasa dang lir. Naga yimten tebilemtsüji yimtenren mapa ajak madak lir aser onoki iba telongjem ajanga telemtetba ka tekaratiba nung agitettsü imlar, ta paisa ashi.
“NPF sorkar ano küm ana anünga alir aser iba sülen state general election agitsü. Ibaji masüdang sorkar anema ken o madoktsütsüsa asenoki mapa inyaktsüla. Asenoki nübortemi aginüba ama terenlok bener arutsüla” ta SI Jamir-isa ashi aser paisa NPF MLA tem dang iba alizüng tongtettsü atema bendanga agütsüshir inyaktsü ayongzük.
Iba senden nung JD(U) taoba tir Mhonjan Humtsoe aser NCP taoba tir Er T L Semdok nati o jembi aser tenatia NPF züngsemtem dang bendanga agütsüshir Party leadership tashi itdaktsütsü ayongzük.