Naga Yimten Tebilemtsü atema telemtetba nung Naga nunger ajak adentsüla : Dr Shurhozelie

Kohima, March 29 (TYO): Naga People’s Front (NPF)-i India sorkar aser NSCN(IM) tsüngda yimjung olemtep pusema nungiter saka tatembang telemtetba nung Naga nunger ajak adentsüla, ta Nagaland Chief Minister, Dr Shurhozelie Liezietsu-i tanü ashi.
“NPF-i Naga Yimten Tebilemtsü atema ajaki agizüktettsüsa tekaratiba nung telemtetba ka agidaktsünür. August 3, 2015 nü GoI aser NSCN (IM) tsüngda Framework Agreement agiba onoki pusemer saka tatembang telemtetba nung Naga nung ajak adentsüla” ta tanü Indira Gandhi Stadium nung Kohima Division NPF Leaders’ Convention nung o jembidang CM aser NPF Tir, Dr Shurhozelie-i ashi.
Paisa, Nagaland nung regional party tentetba indang osang metetdaktsüdang, “party indang inyakyimbo mapang shia tensa den apet melenshiyonga aruogo saka NPF indang tangatetbabo 1963 küm Election Commission of India den register asüdang aliba ama memelenshii dang lir,” ta ashi.
Naga lima nung ozüng alema mapa inyakba aser azütokshi anendaktsütsü atema 1960 nung India sorkar aser Naga People’s Convention tsüngda 16-point Agreement agiba bilemteta jembidang, “Agreement agiaka, iba ajanga alizüng metongtet, kechiyong telungpur telok aika nungi tanishirtem iba nung densema maliasü. Iba yongji tanga Agreement ka agitsü nüngdak ta ajiteta regional party tentet” ta Dr Shurhozelie-i ashi.
“Naga nunger aser India sorkar tsüngda tatembangba telemtetbaji Statehood masü ta onoki bilemer aser tatembang telemtetba ka agiba nungji Naga yimten telok ajak aser Naga nunger ajak adentsü imlar” ta paisa shisem.
“State sorkari tetsür nem shilem 33 lemzükja Urban Local Bodies indang elections agitsü atema telemtetba agi saka civil society temi iba telemtetba ajanga Arrla 371(A) nung kongshir ta shia lungkak ait aser tensa mejungi aküm. Ajisüaka, mapang talangka tejakdang nungi sorkari yimya balala nung tetsür nem shilem lemzükja arur. Mahila Battalion lapok, Village Development Board nung tetsür nem shilem lemzüktsü aser tanü tetsürtemi government aser private sectors nung inyakba dang masü melangtepba ama tetoktepba nunga shilem agir,” ta Dr Shurhozelie-isa ashi.
“Item onüktem nungbo civil society temi Arrla 371(A) nung kongshir ta mashi saka kechiba parnoki ULBs onük nungdang ola adoker. Lennirtemi Putu 21 buba angatettsüla aser Naga nungertemi tensa den apet tangatetba melenshitsüla. Anungji, Naga civil society temi iba onük ya teti atema anentsüla,” ta paisa shisem.
Tanü sentong nung taoba Chief Minister aser Advisor (Finance) T R Zeliang-ia o jembidang, “2018 elections nung Dr Shurhozelie lenisüba kübok NPF party-i takok tulu ngua sorkar kümtettsü” ta ashi.
Sorkar menden melentepba atema olen ka ashidang, “civil society temi public sentong ayonga agiba dang masü saka tanga tashi kar ajanga NPF sorkar atsüngdoktsü merang” ta TR Zeliang-i ashi.
“Dr Shurhozelie-i tajangzük bushiba tangatetba nung masü saka party kümzüktsü tangatetba nung Chief Minister menden agizük. Anungji, NPF president aser CM tashi itdaktsütsü atema party züngsemtem ajaki mapa inyaktsü aser taruba general elections nung takok angutsü merangdi” ta paisa Dr Shurhozelie nem tenüngsang agüja jembi.
Pa Chief Minister inyakdang Kohima district nung terenlok mapa aika inyak aser item rongnung Medziphema village nung North East Christian University, Kohima nung Medical College, Kohima aser Dimapur tsüngda 4-lane road, Kohima nungi Moreh tsüngda 4-lane road, India sorkari Smart City akümtsü atema Kohima shimtetba, Purana Bazar adena Golaghat Gate nungi Chumukedima tashi lenmang yanglutsü aser Kohima jila nung Police Check Gate Kohima nungi Lerie tashi lenmang yanglutsü (Rs 250 crore project) tem lir ta TR Zeliang-isa metetdaktsü.
Yaküm December ita Nagaland Angh-i sayatsüba Vision 2030 document indang jembidang, TR Zeliang-i party lennirtem dang NPF-i DAN sorkari alizüng ayubatem Nagaland nung nübor ajak dang metetdaktsütsü asoshi iba document jungjunga azüngtsü ayongzük.
Sentong nung Social Welfare Minister, Kiyanilie Peseyie-ia tajungshi o jembi aser Gonei-u Sirie-i Presidential address jembi.
Sentong nung mendenji NPF Kohima Division Working President, Kezoneilie Theünuo liasü, UNBC Kohima Pastor, Rokowhelie Pienyü-i temoatsü meshia sarasadem.
Sentong nungsa Jubilant Boys, Mhasizolie Metsi-o aser Dziesekhrienuo Keretsü nungeri ken aten aser Vice President Vira Lhousa-i anküp tepela o jembi.