Naga yimten tebilemtsü lemtettsü atema inyaker: Imkong L Imchen

Kohima, May 15 (TYO): Naga telungpur telok ajaki longjemer India sorkar den Naga yimten tebilemtsü tekaratiba nung lemtettsü atema Nagaland sorkari nangzükba ama mapa inyaker, ta Forest, Environment & Climate Change Minister, Imkong L Imchen-i ashi.
State Civil Secretariat nung Hombarnü osangbener den sensaksemdang Imkong L Imchen-i India sorkar aser NSCN(IM) tsüngda Framework Agreement agiba atema tenüngsang agütsü. “India sorkari Naga telungpur telok ajak den olemtep alitsü memulungtsü akok, anungji Naga yimten tebilemtsü atema telemtetba ka agitsü atema Naga nunger ajak longjemtsüla” ta pai ashi.
Indo-Naga yimten olemtep nung yariteper ka ama Chief Minister, Dr Shurhozelie Liezietsu lenisüba kübok sorkari Political Affairs Mission (PAM) ka tentetogo, ta paisa shisem.
State Cabinet Committee on PAM-i April 8, 2017 nü Chumukedima, Dimapur nung NSCN(K) dak alia Naga telungpur telok pungu den olemtep liogo aser kobi melii NSCN(IM) den ajurutepa olemteptsü, ta Imkong L Imchen-isa osangbener dang ashi.
Tesüiba küm ana jungnüa Naga nungertemi Framework Agreement dak sendakba onüktem jembiyonga arur. Naga nunger tarutsü atema Framework Agreement ji tongtipang ta bilemba agi nisungtemi pei tangatetbatem lemsateper aser ibaji tim dang. Ajisüaka, Naga yimten tebilemtsü asoshi telemtetba ka agitsü atema olemtep aliba teloktem aser state nung yimtenren teloktem dena Naga public tsüngda angatetteptsü nüngdaker, ta paisa shisem.
Yimten tebilemtsü atema olemtep nung Naga nunger telungpur telok 7 shi maden, anungji India sorkar aser NSCN(IM) nati parnok denjia tesentaktep yanglutsüla. Kasa mapang nung Naga telungpur telok 7 ji külem sabang ka nung longjemer Naga yimten tebilemtsü atema inyaktsü ayongzüker, ta Imkong L Imchen-isa ashi.
“Naga nungertemi asen tarutsü tia yanglutsü atema tang ajurua aliba maongka ya mesüidaktsütsüla. Taruba State general election ji February 2018 tashi nung agitsü akok, anungji ibaji matongdang Naga yimten tebilemtsü atema telemtetba ka agir alitsüla” ta paisa shisem.
Minister Imkong-isa ashiba agi, tanü pai jembiba onükji pa indang tebilemba dang lir aser shinga anema jembiba masü.