Naga Yimten tebilemtsü nung national lennirtem teyari angur

Dimapur, February 16 (TYO) : Yaküm August ita India sorkar aser NSCN-IM tsüngda Naga Peace Accord tenangzüktep agiba nung ajemdaker Nagaland sorkari Naga Yimten tebilemtsü asoshi telemtetba tajung agitsü nükjidong nung mapa inyaka arur.
Iba onük ya Parliament nung benoka olemtepdang national political party lennirtem pusema nungitdaktsütsü nükjidong nung Nagaland sorkari yimtenren telok balala nungi lennirtemi den ajurutepa sensaksema arur.
Mongulbarnü Nagaland Assembly Speaker Chotisuh Sazo aser Nagaland Chief Minister TR Zeliang nati anir züngsem 19 adenba Parliamentary Working Committee kati BJP President Amit Shah aser JDU National President Sharad Yadav na den ajurutepa, Naga Yimten tebilemtsü latettsü asoshi inyakba mapa nung pusema nungittsü mepishiogo.
India sorkari shimba Interlocutor RN Ravi-ia Naga nunger ajaki agizüktettsüsa telemtetba ka agitsü nükjidong nung Naga nunger lokti balala den ajurutepa tebilembatem angadanga arudar.
PWC nung mezüngbo Nagaland Legislative Assembly nungi yimten telok balala nungi züngsem 21 den Nagaland nungi MP ana dena liasü aser parnoki national political party ajak nungi lennirtem den ajuruteptsü sentong atonga liasü.
Tanga mapa kar nung mazüngi aliba ajanga tan PWC telok nung Lok Sabha MP Neiphiu Rio mendentet, saka parnok 19-i tanü BJP President Amit Shah den par kidang ajurutep aser idangji pai telangzüba tajung agütsü ta osang angazüker.
Iba sülen PWC-i JDU national president Sharad Yadav den ajurutep aser pai, Naga Yimten tebilemtsü atema “constitutional amendment” ka agitsüsa aküm nunga par teloki pusema nungittsü ta nangzük.
PWC telokisa taruba anogo ishika tsüngda NDA tanishirtem dang masü saka tanga national lennirtem den ajuruteptsü sentong lir.