Naga yimten tebilemtsü tekaraba nung bentettsü imlar: CM

July 3, 2017 nü Nagaland Chief Minister, Dr. Shürhozelie Liezietsu-i pa indang office nung SVP, National Police Academy, Hyderabad nungi aruba IPS Probationers den sensaksemdang agiba noksa angur.

Kohima, July 3 (TYO): Naga yimten tebilemtsü ajanga terenlok mapa aika meinyakteti lir, saka tekaratiba nung telemtetba ka agia state renloka aotsü imlar, ta Nagaland Chief Minister Dr. Shürhozelie Liezietsu-i ashi.
Sardar Vallabhbhai Patel National Police Academy, Hyderabad nungi IPS Probationers 20 aser faculty member 2 den sensaksemdang Dr. Shürhozelie-i iba osang lemsatep.
Parnok ya Bharat Dharshan nung shilem ka ama Nagaland semdangi aru aser Chief Minister’s Office Chamber, Civil Secretariat nung senden ka amen.
Küm 50 tejakdang Nagaland state aküm saka maparen aika nung state merenloki lir. Naga yimten ken o ya linük khuret ka lir aser Prime Minister-i iba asoshi telemtetba ka agitsü atema kanga meranga mapa inyakdar, ta Dr. Shürhozelie-isa metetdaktsü.
“Telemtetba tajung ka agitsü atema onoki telungpur teloktem den jembitepdar” ta paisa ashi.
IPS Probationer temi asüngdangba langzüdang, “Shisaliok indang alizüngji nisung ka tajung kümdaktsütsü atema lir” ta Nagaland chief minister-i ashi.
“Nagaland nung terenlok den meputepi tazünger talila akümba ajanga, Naga lanurtem aika Indian Army ama central mapatem inyaker. Naga yimten tebilemtsü aliba ajanga mapa aika meinyakteti lir” ta paisa shisem.
Dr. Shürhozelie-i Tourism indang onük jembidang, “sorkari infrastructure tajungba kümdaktsütsü atema merangdar. Tzünglu kanga aruba ajanga lenmang amala infrastructure nung timtem ajurur saka sorkari Nagaland nung tourism infrastructure tajungba kümdaktsütsü atema inyaker” ta metetdaktsü.
Chief Minister-isa IPS Probationers dang “nenok künü anogo temaba menden atongtsü aser nenoki asen linük atema tebilemtsü tulu abener” ta ashi.
Asenok kidangersüa aliba linüktem ajakbo tajung masü. Linük tebui asenok dang tashiyim mamshitsü ayongzükba sülen asenoki anidaktsüla saka asenoki tsükchirtem anema renema alitsüla, ta paisa ayongzük.
India linük nung mepetmesü aser mangatettep aika lir, anungji iba asoshi Army, Navy aser Police ya linük tongtiret ama lir, ta Chief Minister-isa ashi.
Nagaland semdangi aruba IPS probationers rongnung Bhutan aser Maldivian Police Trainee Officers dena lir.