Naga yimten tebilemtsü tekaratiba nung bentettsüla: TR Zeliang

Peren, April 15 (TYO): Naga nunger tarutsü atema Naga yimten tebilemtsü asoshi telemtetba ka tekaratiba nung agitsü nüngdak, ta Nagaland chief minister, TR Zeliang-i ashi.
Hokolbarnü Peren district kübok Jalukie Rongkaidai Village lapoktsüba sentong nung pai iba onük jembi.
Prime Minister, Narendra Modi lenisüba kübok tang teinyakdak NDA sorkar mapang Naga nungeri yimten ken o angatetteptsü atema maongka agitsüla, ta TR Zeliang-isa ashi.
Centre nung Opposition dena tanga national political party temi Parliament nung Naga yimten tebilemtsü onük benokdang teyari agüja nungittsü nangzükogo, ta paisa shisem.
Nagaland Legislative Assembly nung züngsem 60 pronglai yimten tangatetba aser telok balala tsüngda mangatettep toktsür, ajak külemi Naga yimten tebilemtsü atema mapa inyaker, ta chief minister-isa metetdaktsü.
Naga nunger ketdangsübaren balala kübok aliba khuret koktettsü aser taginüba tongtettsü atema India sorkar aser NSCN (I-M) tsüngda ‘Framework Agreement’ agitepba ajanga teyari tulu angutsü, ta paisa shisem.
Tanü Naga nungertem ka küma melongjemra aser külemi shisadanga mapang shitak nung ola madokra, telemtetba ka angutsü atema teimla mali akümtsü. Kechiyong Naga yimten tebilemtsü atema kanga dang mulungsoa yariteper tang teinyakdak Prime Minister mesüra tang aliba ama Centre sorkar marutsü akok, ta TR Zeliang-isa ashi.
“Naga yimten tebilemtsü atema telemtetba ka mongutetba ajanga Naga nunger yimten telok aika adoktsüsa aküm. Ano küm 2-3 tashi telemtetba mongui ora, telungpur telok teimba akümtsü akok. Aji ta süra asen tanurtem asoshi tarutsüji kechi koma ka asütsü?” ta TR Zeliang-isa ashi.
Nagaland nung MLA 60-i longjembaji Naga nunger public-ia angazüktsüla aser Naga nunger yimten teloktem dena Naga nunger ajak longjemtsü asoshi nendakba inyaktsüla, ta paisa ayongzük.
Iba sentong nung Rural Development Minister, CL John aser Health & Family Welfare Minister, P Longon natia o jembidang Naga nunger longjemtsü tayongzükba agüja liasü.
Sentong nung Geology & Mining Parliamentary secretary, Imtiwapang-a aden aser Peren DC, Peter Lichamo-ia o jembi.
Sentong nungsa Jalukie Rongkaidai Village Council chairman, Chingkhiulung Gonmei-i tesentepertem pela agizük aser yimtsüng indang otsü tatsü agi metetdaktsü.
Jalukie Rongkaidai Village ya 2007 küm tentet aser 2014 nung state sorkari recognized asütsü. Tang iba yimtsüng nung kilen 124 lir.