Naga yimten telatetba ka dangi yakta arutsü : NSCN/GPRN

Dimapur, June 02 (TYO) : Tsüngremi Naga nunger nem agütsüba yimten temeten tematiba ‘sovereignty’ jenjang samar aliba 2015 küm August 3 nü India government den ‘Framework Agreement’ yangluba ajanga shia arudaktsüogo, kechiyong iba tangatettep ken o jagi India government-i Naga nunger tematiba yimten temeten lir ta agizüktetogo aser India den külemi lia kasa temetenji lemsar yimten mapa lateta bener aotsü ta NSCN/GPRN teloki metetdaktsü.
Naga nunger yimten temeten jenjang tematiba nung alitsüba temeten aser teimla ajak 1960 küm 16 Point Agreement aser 1975 küm Shillong Accord yangluba ajanga India temzüng kübok alitsü renemba ajanga samadoker liasü. Iba jagi Naga nunger asoshi yimten temeten atema raratsü lenmang shibangtsür liasü, ajisüaka Tsüngremi shimtetba lenir taoba Yaruiwo, Isak Chishi Swu aser Ato Kilonser, Th. Muivah na lenisüba nung India government-i kasa yimten temeten Naga nungertem den lemsatepa külemi lia aotsü agizükba jagi India o Naga nunger na temeten aser yimten jenjang kasasa nung ayur ta NSCN/GPRN sangdong ajangasa metetdaktsü.
“Framework agreement” ya yimten ken o lir aser idakji ajemdaker Naga yimten ken o yakta latettsü. Iba telatetbajibo yimten kati mulungba nung latettsüba masü saka yimten anapronglai mulungba nung latettsü ta parnokisa metetdaktsü.
Naga yimten nüjiso atema küm 50 dak tali rarar külen India government-i ken o lemtepdaki jaok nungji Naga nungertemi agizükogo, kechiyong India-i Naga yimten tebilemtsü ya prangpong injang agi maoktsü ta angateta aru. Iba sülen taoba küm 20 shi Naga yimten tebilemtsü onük ya India ato kilonser trok tashi den jembia aruba sülen ‘Framework Agreement’ yangluba ya yimten anaprongla asoshi takok liasü. Ibaji ajanga Naga nungertem ya India nunger masü saka sobaliba aser otsü kenyongi balaka ta India-i agizükogo, ta NSCN-IM sangdong ka ajangasa metetdaktsü.
Iba ama jenjang ka tashi tongteta jembitetba ya Naga nunger lokti tenet aser arogoi yariba ajanga asütsü ta NSCn_IM telokisa pelaba metetdaktsü.
Naga yimten tebilemtsü tatembang küma latettsü mapang anasai arur aser iba ama mapang ka nung nisung shingaia nübortem manisatsü mepishir aser NSCN/GPRN kishi ajak asoshi teti lapoka lir ta NSCN/GPRN MIP sangdong ajangasa metetdaktsüogo.