Naga Yimten telok 5-i Naga yimten temeten wazüka ayutsü bangjemtep

Mongulbarnü Hotel Acacia, Dimapur nung Rev. C Wallu Walling-i Naga yimten telok pungu külem senden nung temoatsü meshia sarasademdang agiba noksa angur.

Dimapur, February 23 (TYO) : Naga nungertemi haihaura melii telemtetba agiba kecha magizüktsü aser Naga yimten temeten wazüka ayutsü atema inyakba mapa maneni inyaktsü renema lir, ta Mongulbarnü Hotel Acacia nung Naga yimten telok pungu külem senden ka agidang bangzünga renem.
GPRN/NSCN (Khole- Kitovi), NNC/FGN (S Singnya- Zopra Vero), NNC (Z Royim- V Nagi), NNC (Kiumukam- Hangping) aser NNC (Temjenyanger- Hozheto) telok pungu nungi züngsem noklang asem den timba adenshia iba senden nung aden.
Naga nunger dang asüngdangya mesüi kija mesüra telok shingaia yimtenren tenangzüktep agitsü temeten mali, ta Naga yimten telok pungu nungi lennirtemisa tanü metetdaktsü.
Parnokisa, Nagaland Legislative Assembly nungi Chief Minister aser Speaker nati anir Parliamentary Working Committee(PWC)-i Indo-Naga yimten tebilemtsü atema mapa inyakba atema ashishitep.
Naga kin atema mapa inyakba ya Naga nungertem indang mapa ka lir aser iba ya Naga linük balaka tentettsü mangdang yur Naga nungertemi Naga nunger asoshi inyaker. May 16, 1951 nü Naga plebiscite agiba nung onoki ammeter aser iba ya chichiba Naga national movement lir. Anungji, kija mesüra telok shingaia Naga nunger dang masüngdangi yimtenren tenangzüktep agitsü temeten mali. Naga People’s Convention (NPC)-i meshitak inyakba ama tanaben lepshia meinyaktsüla, ta parnokisa ashi
Forum for Naga Reconciliation (FNR)-i Naga yimten telok balala tsüngda putepshitsü aser sabang ka nung longjemtsü atema mapa tenzük aser nübortemi pusema nungita Naga yimten telok balala tsüngda tongtipang tenangzükba aika agiogo. Anungji, kija mesüra telok kari item tenangzükba aser tangatetba anema inyakra, parnokji ashikülakertem aser Naga nunger anemertem ta züngshitsüla, ta tanü senden nung Naga yimten lennirtemisa metetdaktsü
Nagaland Legislative Assembly nungi Parliamentary Working Committee(PWC)-i India nunger yimten yimsüsürtem teyari meshia senzür, saka shitakba agibo parnoki Naga yimten tebilemtsü asoshi telemtetba ka agitsü atema Naga nungertem aser Naga yimten telok balala den ajurutepa tebilemba lemsateptsüla, ta parnokisa ashi.
NSCN-IM aser India sorkar na tsüngda Framework Agreement agiba nung aliba onüktem parnok ket nung lir asü maliar PWC-i Nagaland nung alir nübortem dang metetdaktsüla, ta parnokisa shisem.
“Asüngdangya kecha mesüi shirnoki parnok nem Naga nunger asoshi mapa inyaktsü nungloktsü?” ta parnokisa asüngdang.
Framework Agreement ajanga Nagaland nung alirtem koma ajangzüktsü aser nübortemi memeteti NSCN-IM den tenangzüktep agiba ajanga kodaser Indo-Naga yimten tebilemtsü asoshi telemtetba ka agitettsü. August 3, 2015 nü Framework Agreement agibaji Naga nunger linük asoshi inyakba mapa nung temelaba melii aitba inyakyim ka lir, ta Naga yimten telok pungu nungi lennirtemisa tanü metetdaktsü.
India-i tashiyim amshia Naga nunger temeten aser taginübatem anema meinyaki Indo-Naga yimten tebilemtsü asoshi yimtenren mapa agi telemtetba ka agitsü atema inyaktsüla. Olemtepba sabang nung shilem agirtem ajak dendaktsür telemtetba tajung ka agitsü atema India sorkari mapa inyaktsü ayongzüker, ta parnokisa ashi.