Naga yimten telok ajaki olemtep nung adentsüla: Pusa

Kohima, April 23 (TYO): Mapang talangka Naga yimten tebilemtsü metembangteti aruba atema Naga nungertem joko tezü tangogo, anungji India sorkar den telemtetba ka agitsü atema Naga yimten telok ajaki shilem agitsüla, ta AICC Member, K V Pusa-i ashi.
Honibarnü Viswema Youth Organisation (VYO) 71 buba Annual Session nung o jembidang Pusa-i iba tayongzükba agütsü.
Naga nungertemi Naga yimten tebilemtsü bendetdaktsünür, anungji telungpur telok ajaki sorkar den olemtep nung adentsüla, ta taoba Minister aser PCC President-i ashi.
“Telemtetba kecha magii nübortem terataba nung meyutsütsüla aser nisung ajaki agizüktettsüsa telemtetba ka agitsü atema asenoki merangtsüla. Asenok longjemtsüla aser asen yimten tebilemtsü atema telemtetba ka bushitsüla,” ta Pusa-isa ayongzük.
Nagaland nung opposition maliba sorkar ka tentettsü atema yimten telok ajak külemi sabang ka longjem aser iba ya India sorkar aser Naga nunger yimten teloktem tsüngda yimjung olemtep aliba nung yariteptsü atema lir, ta paisa shisem.
Iba ama tongtibang mapang ka nung telungpurtemi telok ka toktsür ka nung adenba ajanga nükjidong matongtsü aser ano Naga nunger public memesüzüktettsü. Naga yimten telok lennirtemi Naga nüjiso indang alizüng nung rangloktsüla. Mezüngbo alizüng ka dang yur Naga nüjiso indang mapa tenzük saka tanübo telok aika kümogo aser iba ya nübortemi magizüker, ta paisa shisem.
Naga nungertemi tangar ama renloknür aser ajaki yaritepa telemtetba ka agidaktsünür. Anungji, nisung ajaki aser talisa lanurtemi longjemer asen state nung yimjung maparen nung yariteptsüla, ta AICC Member Pusa-isa ayongzük.