Naga Yimten telok balala nungi züngsem 148 NSCN/GPRN nung aden

Dimapur, October 31 (TYO) : Naga Yimten telok balala nungi züngsem 148-i Naga nunger tarutsü atema inyakba telok ta angateta NSCN/GPRN nung adentsü telemtetba agia denogo, ta NSCN/GPRN sangdong ka nung metetdaktsü.
Steering Executives, Cabinet Kilonsers, Dy. Kilonsers aser Heads of Department ajak adenba Joint Council of NSCN/GPRN-i parnok pelashishia agizükogo, ta sangdong nungsa shia lir.
“Telatetba tajung ka ngutettsü atema nübortemi ka küma longjemtsü akhanger. Naga nunger rongnung telemsa onsara adokogo aser asenok alizüng atongtsü atema telongjem nüngdak. Iba jagi onoki NSCN(IM) den lokteptsü telemtetba agi. Iba telok nung züngsemba ya akhüm ka amai bilemer aser nüma atanger. GDRN/NNC tenüng nung ni nenok dang, onok NSCN(IM) nung dang adentsü aser GDRN/NNC (Non-Accordist) joko mali akümer ta nangzüker” ta GDRN/NNC (Non-Accordist), Ato Kilonser, Hangping Zeliang-i metetdaktsü.
GDRN NNC(N.A), President, Khumcho Chilimong-ia ashiba agi, külem adianutem den longjemba ajanga telatetba angutsü aser iba jagi onoki NSCN(IM) den lokteper aser GDRN NNC(N/A) nung civil aser Army wing anenogo.
NSCN(U) Dy. Kilonser, Hotovi Awomi-ia lenmang aibelena jajaba atema Naga nunger dang nungi tatok meshi. Pai ashiba agi, “NSCN(U) ya Naga nunger ajak atema tentetba telok masü kechiyong iba ya süngjang matangba telok ka lir, anungji onok longjemer NSCN(IM”) nung adener.”
Sentong nung NSCN/GPRN, Kilo Kilonser, Rh. Raising-i tayongzükba o jembidang, “Naga nunger asoshi tekümtetji NSCN dak keta lir aser asenok alizüng atongtsü atema chichiba lenmangji iba ya lir” ta ashi.
Paisa, telok nung adenertem dang bendanga agütsüshitsü aser temelenshi bener arutsü tangatetba alitsü atema ayongzük.