Naga yimten teloktemi nisung tasen manioktsüla

Kohima, December 2 (TYO): Naga yimten teloktemi Naga lanurtem manioktsüla aser Naga nungertemia pei chirnurtem yimten teloktem nung medendaktsütsüla, ta Cease Fire Monitoring Group (CFMG) Chairman Lt Gen (retd) Shokin Chouhan-i metetdaktsüogo.
Naga yimten telok balalai lanurtem anioker ta osang sangdongba nung ajemdaker Chouhan-i iba osang metetdaktsü.
Mon district kübok Tizit nung lanur 32 kümzükogo ta November 24 nü Assam Rifles-i iba dak sendakba osang tesüsabuba metetdakja lir.
Naga yimten atema tatembang telemtetba ka agitsü mapang ka nung Naga yimten teloktemi lanurtem dang telemtetba agiba sülen mapa agütsütsü ta shia anioker, paisa ashi.
“Joko telemtetba agitsü mapang tongogo aser ibaji Nagaland Governor aser Interlocutor for Peace Talks, R N Ravi-ia metetdaktsüogo. Anungji yimten teloktem nung züngsem tasen aniokbaji inyakyim tamajung ka lir” ta CFMG chairman-isa ashi.
“Telemtetba agiba sülen telungpurtem nem mapa agütsütsüsa akümtsü. Iba nung nisung karbo küm aika züngsem aruba aser kar tasen asütsü. Tang yimten teloktemi züngsem tasen aniokba ajanga tetsükdaktsü ajurutsü kechiyong lanurtemi mapa angutsü teimla nung adentsü saka mapa mangutsü akok. Kechiyong mapa agütsütsü asoshi küm reprangtsü” ta Shokin Chouhan-isa metetdaktsü.
“Nenok nübo tasentem manioktsüla kechiyong telemtetba agiba sülen sorkari parnok nem mapa magütsütettsü aser tanü nenoki aniokba tanurtemi nenok anema noktaktsü. Tsüraburtemi pei chirnurtem medendaktsütsüla kechiyong telemtetba agiba sülen parnoki mapa mangutsü” ta paisa ashi.
“Tsüraburtemi ken o kecha mebenokra CFMG-i kecha mesütettsü ta Cease Fire ground rules nung lateta lir. Naga yimten atema telemtetba agiba sülen ang telungpurtem yaritsü atema nübotem jangjatsü. Tang tashi nungbo Naga yimten teloktem nung züngsemtem indang osang tejangja yimjak nung memetetdaktsüi lir, saka security forces ket nung osang tejangja lir aser züngsemtem maitsü jangjatsü indang teinyaktsü kanga junga lateta lir” ta Chouhan-isa shisem.
Manipur aser Arunachal state tem nung Naga yimten teloktemi mapa inyakba atema osangbenertemi asüngdangdang “Ni iba atemaji kecha meshitettsü kechiyong ni Nagaland state reprangtsü atema dang mapa lemzükja lir” ta pai langzü.
Naga yimten teloktem nem designated camps 14 lemzükja lir saka teloktemi iba dak alia teseptem tenteter, ta Lt Gen Chouhan-isa ashi.
NSCN (IM) indang designated camps 9, NSCN (Kitovi) indang 3 NSCN (Reformation) aser NSCN-K (Khongo) indang ka ka lemzükja lir. Parnoki iba dak alia tesep tasen tentettsü makok, ta paisa shisem.
“Ozüngi memelaba teseptem shibangtsütsübaji state sorkar aser security forces dak keta lir. Asenoki ajaki cease fire ground rules sülen anidaktsüla” ta paisa metetdaktsü.