Naga yimten tembangtettsü !

Küm ishika tejakdang, Nagaland government nung yimsüsür aser Naga nunger lokti tentettem nung lenirtemi India government den Naga nunger yimten nüchiso bushirtemi Naga yimten tebilemtsü ken o tatembang küma latettsü asoshi jembiba maparen ya len shitakleni odagi ta taolen ajak nung yimjak nung metetdakja jembiba bilemtetter. Iba osang sangoktsüba denji tanü India den Naga yimten tebilemtsü ken o jembiba jenjang ya angadangra, kenyongi balala amai angatetter. Tanübo akhidang jembiba amato masü saka Naga yimten tebilemtsü ken o jembiba maparen ya meshitak leni aor amai angashir. Ibai ajak asoshi shisabolutsüka lir. Taoba küm paikaya India den Naga yimten ken o jembibaren shitak odagi ta jembia jembia tangatettepi marutettsüsa kümadokra, ibajibo lenirtemi nübortem ashioktsüba mapa ka asütsü. Atangji, tang tashi Naga yimten  bushir teloktem o India government na tsüngda Naga yimten jenjang tasen ka latettsü asoshi kechi onüktemsa benoka jembiar, tejembirtemi metetba dak alaka tangaribo memetet. Ajisüaka, tejangja ka metetbaji Naga nunger lushi ya yimten yimsüsüba ka kübokbo melongjemtettsü aser Naga nungertem ya India telongjem nung medeni kin balaka rakzükaa moutettsü, anungji India-bo India küboksa alitsü. Ajisüaka, Naga yimten teloktem rongnunga, NSCN-IM teloki Naga nunger yimten nüchiso jenjang balaka mengutetaka, Naga nunger wako (flag) aser temzüngbo balaka alitsüla ta akangba onüktem Indiai magizüktetba tebilemtsü indang tanü ajaki jembir. Atangji, Naga nungertemi dang India telongjem kübok alitsü mulungra, Naga nunger wako balaka aser temzüng balaka lateta amshitsübaji India asoshi tetsükdaktsü tulukabo masütsüla. Naga nunger wakoji amshitsü saka kongsa aser kodang shirnoki amshitsü itemjiang latettsüla. Asenoki parnok ait nung ken o jembirtemi kechikomaka jembiar memetet, saka asenoki angatettsü agi, Naga nungertem ya India kübokbo India küboksa alitsü, iba jagiang Indiai haihaura kaa telemtetba kati aruner. Ibaji shitak süra, asenoki angatettsü agi, India kübok aliba Naga lima nungji tang amai India wakoa amshitsüsa adoktsü. Tetezü, Naga lima tasenba nungji Naga nunger wakoa amshitsü aser India wakoa amshitsü. Iba kasaji India temzünga amshitsü aser Naga nunger temzünga amshitsü. Tanga asenoki meinyaktetter dang ashi, India temzüng arla 371 A nung ajemdaker, asenoksasa asenoki Naga nunger temzüng ozüng lateta amshitsü koka lir. Iba tangatetba nung, Naga nunger asoshi temzüng balaka nüngdakbaji India aser Naga nunger na pronglai angatet nungbo, tetsükdaktsü kecha melii Naga yimten tebilemtsü ken o ya tembangtettsü. Shidi asünungbo, Naga nungertemi akhi ama India telongjem kübok melili ta tekong memeranger aser Naga nunger lushi ajak yimten ka kübok melongjemtetyonga Naga nunger tangatetba shisatsü aser loktiliba nung longjemra kecha masü ta nüma alur süra, India asoshi Naga yimten jenjang tasen ka latettsübaji kanga tasakbo masütsüla. Tang India telongjem kübok aliba Nagaand yabo Naga nunger lushi tiyongtsü ka nung pateta aküm ama küma lir. Ibayongji, Naga nunger lushi ajak Nagaland state küboki bener aittsü atema Nagaland akümba ken o 16 Point Agreement nunga shisema lir aser Nagaland tatar senden nunga aiben kasa terenemba onük mapa küma inyaktsü asoshi pangzüng azüngba asenoki angshiogo. Ajisüaka, Nagaland tatar senden nung renemba onüktemjibo tenüng ka agi latet dang ashi, mapa küma inyaka aotsü asoshibo kodanga sentong yanglua inyaka aoba mangashi. Atangji, 16 Point pu sema nokdakba agi nisung aika yimsüsür kümogo aser ano külen 16 Point anema kanga sashia nokdakba agia Naga nunger aika yimsüsür küma maongka agir. Tetezü Nagaland nungbo 16 Point Agreement ya yimsüsür akümtsü asoshi election mapang onük tajung ka kümadoker. Iba jagi, Naga yimten ken o jembiba nungbo memeteti aser meteta tashimait aludaktsüogo. Ymten nung pei jenjang alangtettsü asoshi masü Naga yimten jenjang tajungba ka alangtettsü asoshi 16 Point Agreement pu sema mesüra anema nokdak asübo, Naga yimten ken o ya shitak tembangtetla.